“Azərbaycan Beynəlxalq Bankı” (ABB) 2024-cü il üzrə maliyyə hesabatını açıqlayıb. 

Valyuta.az xəbər verir ki, bank ötən ili 293,7 milyon manat xalis mənfəətlə bitirib. Bu isə 2023-cü ilə nisbətən 9% və ya 28,5 mln. manat azdır. Bank 2023-cü ili 322,3 mln. manat xalis mənfəətlə bitirib. 

Hesabat dövründə bankın faiz gəlirləri 17,2% artaraq 914,2 milyon manat, faiz xərcləri isə 85% artaraq 249,5 milyon manat təşkil edib. Bu dövrdə bankın qeyri-faiz gəlirləri 340,2 milyon manata (illik müqayisədə 40,6% çox), qeyri-faiz xərcləri isə 521,1 milyon manata (illik müqayisədə 31,7% çox) bərabər olub. Beləliklə, bank bu dövrdə 497,04 milyon manat əməliyyat mənfəəti əldə edib ki, bu da 2023-cü ilə nisbətən 1% azdır. 

Amma xalis mənfəətdə azalma daha çox məqsədli ehtiyatların kəskin artırılması ilə bağlı olub. Belə ki, Bank kredit risklərini nəzərə alaraq mümkün zərərlər üçün yaradılan məqsədli ehtiyatları bir ildə 48,2 mln. artıraraq 110,65 mln. manata çatdırıb. ABB həmçinin ötən il 74,6 milyon manat mənfəət vergisi ödəyib. 

Cari ilin yanvarın 1-nə bankın cəmi aktivləri 0.3% azalaraq 13,63 mlrd. manata enib. Bununla belə ötən il ABB-nin kredit portfeli (müştərilərə verilmiş xalis kreditlər) 25%-dən çox artaraq 5,86 mlrd. manata çatıb. 2023-cü ildə bu rəqəm 4,68 mlrd. manat təşkil edib. 

Bu dövrdə ABB-nin cəmi öhdəlikləri 11,58 mlrd. manat manat təşkil edib ki, bu da 2024-cü ilin əvvəlinə nisbətən 2,4% azdır. Bankın depozit portfeli (Müştərilərin depozitləri) isə 2024-cü ildə 10 mlrd. manatı ötüb. Bir ildə ABB-nin əmanət portfeli 6,5% və ya 610 mln. manat artıb. 

2025-ci il yanvar ayının 1-nə ABB-nin cəmi kapitalı isə 1,81 mlrd. manatdan 2,05 mlrd. manata yüksəlib.

Xatırladaq ki, ABB 2024-cü ildə ilk dəfə kütləvi səhm buraxılışı (İPO) həyata keçirib və səhmdarlarının sayını 35 minə çatdırıb. Bankın səhmbaşına düşən dividendi 2022-ci ildə 2,8 qəpik, 2023-cü ildə 3,4 qəpik, 2024-cü ildə 4,1 qəpik olub. 2024-cü ildə ABB-nin səhmləri üzrə dividend gəlirliliyi səhmlərin nominal qiymətinə nisbətdə 15,1%-ə yüksəlib. Bank 2025-ci il üzrə də səhmlərin gəlirliliyin 15% olacağını proqnozlaşdırıb.