“Azərbaycanda kapital bazarına xarici investorlar cəlb etmək üçün əvvəlcə qiymətli kağızlar bazarı - birja fəaliyyət göstərməlidir, kapital dövriyyəsi asanlaşmalıdır”. 

Bu sözləri Valyuta.az-a iqtisadçı Natiq Cəfərli xarici şirkətlərin Azərbaycanın kapital bazarına cəlb edilməsi haqqında danışarkən deyib. 

İqtisadçı deyir ki, bizdə kapital dövriyyəsində də problemlər var:

“Banklararası müəyyən istiqrazların, dövlət istiqrazlarının buraxılması ilə müşahidə olunur və banklar öz aralarında Mərkəzi Bankın iştirakı ilə bir-birlərinə kredit və yaxud da borc alıb, borc verə bilirlər. Repo hərracları keçirilir. Bir həftəlik və yaxud da bir neçə günlük olur bu hərraclar. Yəni müddətlə məhdudlaşan kapital bazarı var”.

Natiq Cəfərli bildirib ki, kapital bazarı anlayışı daha genişdir və bura bir sıra qiymətli kağızlar bazarı, səhmlər daxildir:

“Təəssüf ki, bizdə hələ kapital bazarı oturuşmayıb. Bu bazar oturuşsa, kapital bazarına xarici investorların cəlb olunması daha da asanlaşar və xarici investorların marağı yaranır. Hələlik indiki konfiqurasiyada quruluşda kapital bazarına xarici investorların daxil olması üçün alətlər yoxdur. Yeganə SOCAR-ın qiymətli kağızları, müəyyən zəmanətli kağızları, dövlət kağızları var, onları ala bilirlər. Maliyyə Nazirliyinin kağızları, qiymətli kağızları var. Əsasən də yevrobotlar var. Onlara yatırım edirlər. Yəni bizdə çox çeşidli alətlər yoxdur ki, onlardan istifadə edib kapital bazarına xarici kapitalı cəlb eləmək mümkün olsun”.

Davud