Son vaxtlar tez-tez qarşımıza işə qəbulla bağlı bəzi paylaşımlar çıxır. Belə ki, bəzi işə qəbulla bağlı paylaşım edən şəxslər iş müsahibəsində verilən sualları necə cavablasaq, qəbul olunma şansımızın artacağı haqqında fikirlərini bölüşür, məlumat verirlər. Məsələn, "bu işi nə üçün istəyirsiniz" sualına "dediyim kimi cavab versəniz, 100% qəbul olunacaqsınız" kimi fikirlər bildirirlər.

Müxtəlif iş axtaranlar da fərqli müsahibələrdə eyni cavabları verir. Biz bu taktikalardan istifadə etməli, yoxsa özümüzə uyğun cavablar verməliyik?

İnsan Resursları üzrə menecer İlahə Abdullayeva bildirdi ki, iş axtaranın istəkləri fərqli ola bilər: “Hər namizədin işə müraciəti fərqlidir. Məsələn, iş axtaranın müraciət etməsinə səbəb sadəcə əməkhaqqı ola bilər. Yaxud da işin özü maraqlı ola, namizəd özünü bu işdə görmək istəyə bilər. İstəklər fərqli olduğu qədər cavablar da fərqli olur".

Namizəd dürüst cavab verməyi bacarmalıdır

İ.Abdullayeva deyir ki, bu kimi suallara individual cavab vermək lazımdır: “Fərqli ehtiyac və tələblərlə müraciət edən hər bir namizəd istinasız HR-ın verdiyi suallara normal, dürüst şəkildə cavab verməlidir. İllərlə təcrübəmdə görmüşəm ki, müsahibəyə gəlib olduğu kimi doğru şəkildə cavab verən namizədlərə daha çox diqqət ayrılır, seçilmə şansları da daha çox olur".

Sərvanə Rəmixanova