"Starbucks" şirkəti baş direktor Brayan Nikkolun (Brian Niccol) rəhbərliyi altında həyata keçirilən "Starbucksa geri dönüş" planına uyğun olaraq işçi ixtisarlarına başlayır.

Valyuta.Az xəbər verir ki, şirkətin veb saytında yerləşdirilmiş yazıda Nikkol bildirib ki, "daha səmərəli fəaliyyət göstərmək" üçün "çətin qərarlar və seçimlər etmək" lazım olacaq. Bu tədbirlərin nəticəsində "iş yerlərinin ixtisarı və dəstək komandalarının kiçilməsi" gözlənilir. İşdən çıxarılacaq əməkdaşlara mart ayının əvvəlinədək məlumat veriləcək.  

"Ola bilsin ki, bu qərarlar müəyyən qeyri-müəyyənlik və narahatlıqlar yaradacaq, lakin mən bu prosesi şəffaf aparmaq və bu məsələləri birbaşa özüm izah etmək istəyirəm," deyə o qeyd edib.

2024-cü il sentyabrın 29-na olan məlumata əsasən, "Starbucks" dünya üzrə təxminən 361,000, ABŞ-da isə 211,000 nəfər işçi çalışdırır. İşçi qüvvəsinin böyük hissəsi mağaza işçilərindən ibarət olduğundan, ixtisarlar onlara təsir etməyəcək. Əvəzində, korporativ dəstək və digər qeyri-mağaza vəzifələr, o cümlədən mağaza inkişafı, qovurma, istehsal, anbar və paylama sahələrində təxminən 10,000 iş yerini əhatə edəcək.

Keçmişdə "Chipotle" şirkətinə rəhbərlik etmiş Nikkol, son bir neçə rübdə məyusedici nəticələrdən sonra, 53 yaşlı şirkətin satış artımını yenidən canlandırmağı qarşısına məqsəd qoyub.

"Deutsche Bank" analitiki Loren Silberman müştərilər üçün son qeydlərində bu addımları "Starbucksın dönüş strategiyasının başlanğıcı" kimi qiymətləndirib. O, yaxın aylarda daha yaxşı marketinq, əməliyyat və yeniliklərlə müştəri axınının artacağını proqnozlaşdırıb.  
Silberman əlavə edib ki, ABŞ-də eyni mağaza satışlarında dönüş nöqtəsi səhmlər üçün əsas katalizator olacaq, həmçinin Çində yeni imkanlar haqqında xəbərlər də şirkətin inkişafına dəstək verəcək.

Qeyd edək ki, "Starbucks" səhmləri son bir il ərzində "S&P 500" indeksinə nisbətən daha zəif performans göstərib, cəmi 4% artım nümayiş etdirərək 26.5% artımlı indekslə müqayisədə geri qalıb.

Rəhim