"YouTube"da 1 milyon izlənmə 5 500 dollar qazandırır - YouTuber açıqladı

"YouTube" platformasında qısa videoların monetizasiya imkanları ilə bağlı müzakirələr davam edərkən, bir YouTuber "YouTube Shorts" vasitəsilə əldə olunan real gəlirlə bağlı açıqlama verib.

Məlumata görə, vidIQ adlı YouTube kanalı 1 milyon YouTube Shorts baxışından əldə etdiyi gəliri ictimaiyyətlə bölüşüb. Kanalın paylaşdığı analitik göstəricilərə əsasən, bu qədər baxışdan əldə olunan gəlir cəmi 58 dollar təşkil edib.

Videoda qeyd olunub ki, YouTube Shorts üçün 1 000 baxışa düşən gəlir, yəni RPM göstəricisi təxminən 6 sentdir. Müqayisə üçün bildirilib ki, uzun formatlı videolarda 1 milyon baxışdan əldə olunan gəlir orta hesabla 5 500 dollar civarındadır. Bu isə qısa videolarla uzunmüddətli kontent arasında gəlir baxımından ciddi fərq olduğunu göstərir.

Açıqlamada vurğulanıb ki, YouTube Shorts vasitəsilə reklam gəliri əldə etmək üçün son üç ay ərzində ən azı 10 milyon baxış toplamaq tələb olunur. Bu göstərici aylıq orta hesabla 3 milyon baxış və təxminən 150 dollar gəlir deməkdir.

Məsələ sosial şəbəkələrdə də geniş müzakirələrə səbəb olub. İstifadəçilərin bir qismi 1 milyon baxışa düşən 58 dolları çox aşağı məbləğ kimi qiymətləndirib. Digərləri isə xüsusilə yeni və kiçik kontent yaradıcıları üçün bu gəlirin belə mühüm nailiyyət olduğunu bildirib.

Qeyd edək ki, vidIQ kanalı YouTube istifadəçilərinə baxış sayını artırmaq, abunəçi qazanmaq və monetizasiya prosesini daha effektiv idarə etmək üçün analitik və məlumat əsaslı tövsiyələr təqdim edir.

Tənzilə Ağabalayeva