Bu il kriptovalyuta bazarında rekord oğurluq - Arxasında bu ölkənin hakerləri dayanır

2025-ci ildə kiberhakerlər kriptovalyuta bazarından ümumilikdə 2,7 milyard dollar vəsait oğurlayıb. Bu, kripto tarixində qeydə alınmış ən böyük illik itkidir.

Valyuta.az xəbəər verir ki, Blokçeyn monitorinq şirkətlərinin məlumatına görə, il ərzində kriptobirjalar Web3 və DeFi layihələrinə qarşı onlarla kiberhücum baş verib. Ən böyük hadisə Bybit birjasına edilən hücum olub. Nəticədə hakerlər təxminən 1,4 milyard dollar dəyərində kriptovalyuta ələ keçiriblər. Hücumun arxasında Şimali Koreya hökumətinə bağlı haker qruplarının dayandığı bildirilir.

Bu hadisə kripto tarixində ən iri məlum oğurluq, həmçinin bəşəriyyət tarixindəki ən böyük maliyyə talanlarından biri hesab olunur. Müqayisə üçün, 2022-ci ildə Ronin Network və Poly Network hücumlarında oğurlanan məbləğlər 624 və 611 milyon dollar olub.

Kriptovalyuta analitik şirkətləri Chainalysis və TRM Labs 2025-ci il üzrə ümumi itkini 2,7 milyard dollar olaraq təsdiqləyib.

Hesabatlara görə, il ərzində ən azı 2 milyard dollar kriptovalyuta Şimali Koreya mənşəli haker qrupları tərəfindən oğurlanıb. Qiymətləndirmələrə əsasən, bu qruplar 2017-ci ildən bu yana 6 milyard dollara yaxın kripto vəsaiti ələ keçirib.

Digər iri hücumlar arasında Cetus (223 mln. dollar), Balancer (128 mln. dollar) və Phemex (73 mln. dollardan çox) yer alır.

Qeyd edək ki, 2023-cü ildə kripto oğurluqları 2 milyard dollar, 2024-cü ildə isə 2,2 milyard dollar səviyyəsində olub.

Sərvanə Rəmixanova