"Microsoft"dan 9,7 milyard dollarlıq investisiya

"Microsoft", süni intellekt infrastrukturunu gücləndirmək məqsədilə məlumat mərkəzi operatoru olan "IREN" şirkəti ilə 9,7 milyard dollar dəyərində bulud xidmətləri üzrə beşillik müqavilə imzalayıb.

Valyuta.az xəbər verir ki, razılaşma çərçivəsində "IREN", texnologiya nəhəngi "Microsoft"a "Nvidia"nın yeni nəsil GB300 GPU-larına çıxış imkanı təqdim edəcək.

Müqavilə ümumi məbləğin 20 faizini ilkin ödəniş kimi nəzərdə tutur. GPU-ların 2026-cı ilə qədər Texas ştatındakı 750 meqavatlıq "Childress" kampusunda mərhələli şəkildə işə salınması planlaşdırılır. Bu müddətdə "IREN", maye ilə soyudulan yeni məlumat mərkəzləri inşa etməklə ümumilikdə 200 meqavatlıq hesablama gücünə çatmağı hədəfləyir.

ABŞ və Kanadada bərpa olunan enerji mənbələrinə yaxın ərazilərdə yerləşən məlumat mərkəzləri ilə tanınan "IREN", genişmiqyaslı GPU klasterləri təqdim edən süni intellekt əsaslı bulud xidmətləri şirkəti kimi fəaliyyət göstərir.

"IREN"in həmtəsisçisi və icraçı direktoru Daniel Roberts bu razılaşmanı şirkətin miqyaslana bilən süni intellekt bulud platformasını gücləndirən strateji dönüş nöqtəsi kimi dəyərləndirib. "Microsoft"un biznesin inkişafı üzrə rəhbəri Conatan Tinter (Jonathan Tinter) isə bildirib ki, bu əməkdaşlıq hər iki şirkətə süni intellekt infrastrukturunda yeni böyümə imkanları yaradacaq.

Müqavilə çərçivəsində "Microsoft", süni intellektə artan qlobal tələbat fonunda məlumat mərkəzi imkanlarını genişləndirir. Paralel olaraq, "IREN", Şimali Amerikada malik olduğu 3 giqavatlıq enerji portfeli ilə süni intellekt bulud infrastrukturu sahəsində mövqeyini daha da möhkəmləndirməyi qarşısına məqsəd qoyub.

Mayya Hüseynova