Meg O’Neill kimdir? BP-nin yeni rəhbəri barədə əsas məlumatlar

Meg O’Neill qlobal neft-qaz sənayesində 29 illik təcrübəyə malik tanınmış menecerdir. O, 2021-ci ildən etibarən Avstraliyanın "Woodside Energy" şirkətinin Baş icraçı direktoru və idarəedici direktoru vəzifəsində çalışıb.

Valyuta.az xəbər verir ki, bu dövrdə O’Neill-in rəhbərliyi altında Woodside mühüm birləşmə həyata keçirərək Avstraliya Birjasında (ASX) siyahıya alınmış ən böyük enerji şirkətinə çevrilib. Sözügedən birləşmə Woodside-ın Avstraliya LNG sənayesinin əsas qurucularından biri kimi tarixini möhkəmləndirməklə yanaşı, şirkətə coğrafi baxımdan şaxələndirilmiş, yüksək keyfiyyətli neft və qaz aktivləri portfeli qazandırıb.

Meg O’Neill Woodside-a 2018-ci ildə Əməliyyatlar üzrə baş direktor (COO) kimi qoşulub və istehsal aktivlərinə cavabdeh olub. 2019-cu ildə İnkişaf üzrə icraçı vitse-prezident təyin edilərək Avstraliya və Seneqalda iri böyümə layihələrinə rəhbərlik edib. 2020-ci ildən etibarən isə marketinq fəaliyyətlərinə də nəzarət edib.

Woodside-dan əvvəl O’Neill "ExxonMobil" şirkətində uzun illər çalışıb. O, ABŞ, İndoneziya, Kanada və Norveçdə texniki, əməliyyat və rəhbər vəzifələrdə fəaliyyət göstərib, həmçinin Anqola, Nigeriya, Tanzaniya və Mozambikdə iri layihələrə məsul olub.

Meg O’Neill hazırda "Australian Energy Producers" (Avstraliya neft-qaz sənayesinin əsas qurumu) təşkilatının sədri, "American Petroleum Institute" daxil olmaqla bir sıra qurumların idarə heyətinin üzvüdür. O, həmçinin MIT-də okean və kimya mühəndisliyi ixtisasları üzrə ali təhsil alıb və ABŞ-ın Kolorado ştatının Boulder şəhərində doğulub.

Qeyd edək ki, Meg O’Neill gələn ilin aprelin 1-dən BP-nin yeni Baş icraçı direktoru kimi fəaliyyətə başlayacaq.

Sərvanə Rəmixanova