İşçinin işdə 2 saat boş qalması normal haldırmı?

Bir çox iş yerlərində rəsmi iş vaxtı saat 18:00-a qədər davam etsə də, bəzi qurumlarda faktiki iş prosesi artıq saat 16:00-da yekunlaşır. İşçilər bildirirlər ki, bu saatdan sonra yeni tapşırıqlar verilmir, gündəlik işlərini tamamlasalar da, iki saat ərzində ofisdə qalmağa məcbur olurlar. Onların fikrincə, real iş fəaliyyəti olmadığı halda bu müddət sadəcə vaxt itkisinə çevrilir. Bəs işçinin iki saat ərzində boş qalması normal haldırmı, yoxsa bu, idarəetmədə müəyyən problemlərin mövcudluğundan xəbər verir? İşçilər bu boş vaxtı necə dəyərləndirməlidirlər?

Mövzu ilə bağlı “HR Hunter” şirkətinin qurucusu, İnsan Resursları üzrə konsultant İlkin Mirzəzadə Valyuta.az-a bildirib ki, ideal halda iş saatları ərzində iş prosesi tam şəkildə planlaşdırılmalı və doldurulmalıdır: “Əgər iş vaxtı rəsmi olaraq davam etsə də, faktiki iş daha tez bitirsə, bu vəziyyət əsasən iki səbəblə bağlı ola bilər. Birinci səbəb idarəetmədə müəyyən boşluqların olmasıdır. Yəni, işçinin vəzifə öhdəliklərinə uyğun tapşırıqlar tam şəkildə formalaşdırılmır və ya düzgün bölüşdürülmür. İkinci səbəb isə işçinin şəxsi iş tempidir. Elə əməkdaşlar var ki, digərlərinin bir neçə saata gördüyü işi daha qısa müddətdə yerinə yetirə bilir və nəticədə boş vaxt yaranır”.

Ekspertin sözlərinə görə, nadir hallarda bu hal işçinin yeni olması ilə də əlaqəli ola bilər: “Bəzi hallarda əməkdaş yeni olduğu üçün ona hələ tam öhdəlik verilməyə bilər. Lakin bu ehtimal adətən qısamüddətli olur və əsas səbəb kimi qiymətləndirilmir. Əksər hallarda məsələ ya idarəetmə planlaması, ya da işçinin yüksək məhsuldarlığı ilə bağlıdır”.

İlkin Mirzəzadə qeyd edir ki, iş saatları ərzində yaranan boşluq mütləq mənfi hal kimi dəyərləndirilməməlidir: “Əgər işdə boş vaxt yaranırsa, bunu şəxsi inkişaf üçün fürsətə çevirmək mümkündür. Məsələn, əməkdaş qarşıdakı ay üçün planlaşdırılan hesabatları əvvəlcədən hazırlaya, onlayn təlimlərdə iştirak edə, peşəkar biliklərini artıracaq araşdırmalar apara bilər. Bir çox işçi bu cür vaxtları özünüinkişaf üçün səmərəli şəkildə dəyərləndirir”.

Ekspertin fikrincə, düzgün idarəetmə və aydın iş bölgüsü olduqda həm işçinin vaxtı itmir, həm də şirkətin ümumi məhsuldarlığı artır.

Sərvanə Rəmixanova