"OpenAI" "ChatGPT"nin ünsiyyət üslubunu fərdiləşdirilə bilən etdi

"OpenAI" "ChatGPT"nin həddindən artıq rəsmi və məsafəli olması ilə bağlı tənqidlərdən sonra platformada yeni fərdiləşdirmə imkanlarını istifadəyə verib.

Valyuta.az xəbər verir ki, GPT-5.2 yeniləməsi ilə istifadəçilər artıq ChatGPT-nin cavab tonunu daha çevik şəkildə tənzimləyə bilirlər. Yeni ayarlar arasında “Warm” (isti ton), “Enthusiastic” (enerjili üslub), başlıq və siyahılardan istifadə və emoji seçimləri yer alır. Bu parametrlər vasitəsilə cavabların daha səmimi, dinamik və ya daha sadə formada təqdim olunması mümkündür.

Qeyd edək ki, "OpenAI" daha əvvəl GPT-5.1 versiyası ilə “Professional”, “Candid” və “Quirky” kimi üslub seçimlərini təqdim edib. GPT-5-in istifadəyə verilməsindən sonra ChatGPT-nin daha rəsmi tona keçməsi ilə bağlı artan tənqidlər isə bu yeniliyi zəruri edib.

Yeni fərdiləşdirmə imkanları ChatGPT-nin gündəlik söhbətlərdən tutmuş peşəkar istifadəyədək fərqli ssenarilərə uyğunlaşmasını hədəfləyir. Bununla da ünsiyyət tərzi ChatGPT üçün standart deyil, istifadəçi tərəfindən idarə olunan xüsusiyyətə çevrilib.

Sərvanə Rəmixanova