“Azərbaycan Dəmir Yolları” ötən ili 1.8 milyard manat zərərlə başa vurub

“Azərbaycan Dəmir Yolları” Qapalı Səhmdar Cəmiyyəti 2024-cü ili 1 milyard 820 milyon manat zərərlə başa vurub.

Valyuta.az xəbər verir ki, bu, əvvəlki illə müqayisədə 1 milyard 719 milyon manat və ya 18 dəfə artımdır.

2023-cü ildə qurumun xalis zərəri 100 milyon 963 min manat təşkil edib. 

Maliyyə hesabatına əsasən, ötən il cəmiyyət yükdaşımalardan 483 milyon 128 min manat, sərnişindaşımalardan 11 milyon 696 min manat gəlir əldə edib.

2024-cü ilin sonuna olan məlumata görə, “Azərbaycan Dəmir Yolları”nın aktivləri 4 milyard 464 milyon manat olub ki, bu da illik müqayisədə 25 faiz azalma deməkdir. Eyni tarixə cəmi öhdəliklər 1 milyard 174 milyon 485 min manat, balans kapitalı isə 3 milyard 290 milyon 60 min manat təşkil edib.