İctimai iaşə sahəsində nağdsız dövriyyəyə vergi güzəşti nə qədər olacaq? - İzahat

Məlum olduğu kimi, vergi qanunvericiliyinə əsasən, 2024-cü il yanvarın 1-dən etibarən tibb müəssisələrinin və özəl tibbi praktika ilə məşğul olan fiziki şəxslərin hesabat dövrü ərzində əhaliyə göstərilən tibbi xidmətlər üzrə nağdsız qaydada, POS-terminal vasitəsilə aparılan ödəmələr əsasında formalaşan dövriyyəsinin 50 faizi 3 il müddətinə onların ƏDV tutulan ümumi dövriyyəsindən çıxılır.

Bu optimallaşmanın davamı olaraq, 2026-cı il yanvarın 1-dən ƏDV qeydiyyatında olan ictimai iaşə fəaliyyəti ilə məşğul olan şəxslər üçün də oxşar güzəştlərin tətbiqi nəzərdə tutulur. Belə ki, həmin şəxslər tərəfindən POS-terminal vasitəsilə nağdsız qaydada həyata keçirilən ödənişlər əsasında formalaşan dövriyyənin 50 faizi 3 il müddətinə ƏDV tutulan ümumi dövriyyədən çıxılacaq.

Valyuta.az xəbər verir ki, bununla yanaşı, 8 faiz dərəcə ilə sadələşdirilmiş verginin ödəyicisi olan ictimai iaşə subyektləri üçün POS-terminal vasitəsilə həyata keçirilən nağdsız dövriyyə üzrə vergi dərəcəsinin 6 faizə endirilməsi təklif edilir.

Dəyişikliyin tətbiqi aşağıdakı nümunə ilə izah olunur: İctimai iaşə fəaliyyəti ilə məşğul olan şəxsin bir ay ərzində göstərdiyi xidmətlərin ümumi dəyəri 50 min manat təşkil edib. Bu məbləğin 10 min manatı nağd, 40 min manatı isə POS-terminal vasitəsilə nağdsız qaydada ödənilib. Digər şəxslərə ödənilən və əvəzləşdirilən ƏDV-nin məbləği 3 min manat təşkil edib. Bu halda büdcəyə ödənilməli ƏDV-nin məbləği əvvəl 6 min manat olduğu halda, dəyişiklikdən sonra 2.400 manat təşkil edəcək.

Başqa bir nümunədə isə ictimai iaşə sahəsində sadələşdirilmiş vergi ödəyicisinin ay ərzində göstərdiyi xidmətlərin dəyəri eyni qaydada 50 min manat olub. Bu məbləğin 10 min manatı nağd, 40 min manatı isə nağdsız qaydada ödənilib. Əvvəllər bu halda sadələşdirilmiş verginin məbləği 4 min manat olduğu halda, dəyişiklikdən sonra 3.200 manat təşkil edəcək.

Göründüyü kimi, nağdsız ödənişlərin xüsusi çəkisinin artması sahibkarlar üçün vergi yükünün azalmasına və əlavə qazanc imkanlarının yaranmasına səbəb olacaq.