“Gravis Robotics” 23 milyon dollar investisiya alıb

İsveçrədə fəaliyyət göstərən və otonom iş texnologiyaları sahəsində ixtisaslaşan “Gravis Robotics” 23 milyon dollar dəyərində investisiya turunu uğurla başa çatdırıb.

Valyuta.az xəbər verir ki, şirkətin açıqlamasına görə, cəlb edilən sərmayə qlobal genişlənməni sürətləndirmək, komandanı böyütmək, tərəfdaşlıq şəbəkəsini genişləndirmək və texnologiyanı inkişaf etdirmək məqsədilə istifadə olunacaq.

“Gravis Robotics” 2022-ci ildə Rayan Luk Cons, Dominik Yud və Marko Hutter tərəfindən təsis edilib. Şirkət ağır iş texnikalarını süni intellekt və qabaqcıl sensor texnologiyaları ilə təchiz edərək onları otonom robotlara çevirir. Tikinti və mədən sahələrində istifadə olunan ekskavator, dozator və yükləyici kimi maşınlar “Gravis”in retrofit sistemi vasitəsilə otonom rejimdə işləyə bilir.

Bu sistem hidravlik sensorlar, LiDAR, kameralar və peyk əsaslı mövqeləndirmə məlumatlarından istifadə edərək maşının ətraf mühitini real vaxtda analiz edir və süni intellektə əsaslanan idarəetmə mexanizmi ilə hərəkətləri optimallaşdırır.

Texnologiya maşınlara xəndək qazma, torpaq işləmə və material daşıma kimi işləri yüksək dəqiqlik və məhsuldarlıqla yerinə yetirməyə imkan verir. “Gravis”in planşet əsaslı interfeysi operatorlara otonom və manuel idarəetmə rejimləri arasında rahat keçid imkanı yaradır və iş axınını təkmilləşdirir. Şirkətin həlləri məhsuldarlığı 30 faiz artırır, əməyin təhlükəsizliyini gücləndirir və təkrar iş hallarının qarşısını alır.

Hazırda “Gravis Robotics” Birləşmiş Krallıq, ABŞ, Avropa, Latın Amerikası və Asiyada fəaliyyət göstərir. Şirkət “Holcim”, “Taylor Woodrow” və “HD Hyundai” kimi sənaye liderləri ilə tərəfdaşlıq quraraq texnologiyasını yayır. Eyni zamanda otonom texnikaların icarəsi bazarına daxil olaraq bu avadanlıqları müştərilərə icarə əsasında təqdim edir.

Mayya Hüseynova