"Buluttan" 1 milyon dollar investisiya alıb

Türkiyənin "Buluttan" startapı “Arya VC” və “APY Ventures”ın idarə etdiyi “İvedik GSYF”nin iştirak etdiyi investisiya turunda 1 milyon dollar maliyyə cəlb edib.

Valyuta.az xəbər verir ki, süni intellekt əsaslı hava kəşfiyyatı həlləri hazırlayan şirkət, bu investisiya ilə birlikdə 2024-cü ildə “ScaleX”, Cem Sibay, Kamil Sözen və Kerim Kotanın iştirakı ilə aldığı 1 milyon dollarlıq pre-seed mərhələsini də nəzərə almaqla, ümumilikdə 2 milyon dollar həcmində maliyyə təmin edib.

2022-ci ildə Güvən Bölükbaşı, Gökmən Güvən və Mehmet Kıral tərəfindən təsis edilən şirkət məkana xas, yüksək zaman və coğrafi dəqiqliyə malik rəqəmsal hava proqnozları, eləcə də süni intellekt modelləri hazırlayır. Bu həllər hava şəraitinin əməliyyat proseslərinə birbaşa təsir göstərdiyi sahələrdə qərar qəbuletmə mexanizmlərində istifadə olunur.

Şirkətin SaaS əsaslı hava kəşfiyyatı məhsulları hava, quru və dəniz nəqliyyatı ilə bağlı logistika əməliyyatlarında qərar dəstək sistemləri təqdim edir. Bərpa olunan enerji sahəsində isə külək, günəş və hidroelektrik stansiyaları üçün istehsal proqnozları, həmçinin enerji bazarına yönəlik analitik alətlər təmin olunur.

Bununla yanaşı, şirkət Avropada əsas süni intellekt atmosfer modeli hazırlamağı hədəfləyən və geniş meteorologiya ekosistemini bir araya gətirən “Horizon WeatherGenerator” konsorsiumunun üzvüdür. Bu çərçivədə Avropanın aparıcı milli meteorologiya qurumları ilə birgə fəaliyyət göstərir.

Cəlb edilən yeni investisiya Türkiyədə böyümənin sürətləndirilməsi, eləcə də Avropa və Yaxın Şərq bazarlarında fəaliyyətin genişləndirilməsi üçün istifadə olunacaq.

Mayya Hüseynova