"Bitcoin" 100 min dollar həddinin altına düşdü - 4 aydan sonra ilk dəfə

Bitcoin 100 min dollar həddinin altına düşüb. 

Valyuta.az xəbər verir ki, Bitcoin dörd aydan sonra ilk dəfə 100 min dolların altına enib. Kriptovalyutanın qiyməti gün ərzində 5% azalaraq 99 966 dollara qədər düşüb. Bu, iyun ayından bəri ən aşağı səviyyədir.

Ekspertlərə görə, azalma süni intellektlə bağlı səhmlərin yüksək dəyərləndirilməsi fonunda riskli aktivlərdən uzaqlaşma meyli ilə bağlıdır. Ether də 9% ucuzlaşaraq 3 275 dollar səviyyəsinə enib.

“Bitcoin və ümumilikdə kriptobazar hazırda tükənmiş vəziyyətdədir. Yaxşı xəbərlər belə bazara ciddi təsir göstərmir”, - deyə Codex platformasının təsisçisi Haonan Li bildirib.

Analitiklər qeyd edirlər ki, fərdi investorların aktivliyi əvvəlki dövrlərlə müqayisədə azalıb. Compass Point analitiki Ed Engel-in sözlərinə görə, uzunmüddətli sahiblər satışa davam edir, bu isə BTC üçün 95 min dollardan yuxarı dəstək səviyyəsini risk altına sala bilər.

Oktyabrın kriptobazar üçün ənənəvi “güclü ay” sayılmasına baxmayaraq, bu il gözlənilən artım baş verməyib. Engel xatırladıb ki, 2018-ci ildə də oxşar tendensiya müşahidə olunmuş və noyabr ayında Bitcoin 37% dəyər itirmişdi.

Hazırda bazar iştirakçıları ehtiyatlı mövqedə qalır və kriptovalyutalarda yeni tənəzzül mərhələsinin başlayacağı ehtimalı güclənir.

Sərvanə