Azərbaycanda xarici şirkətə məxsus avtomobillər 10 faiz endirimlə hərraca çıxarılır

24 dekabr tarixində “BOS Shelf İnternational FZCO” şirkətinin Azərbaycan Respublikasındakı filialına məxsus 84 ədəd nəqliyyat vasitəsi ikinci dəfə olmaqla 10 faiz endirimlə açıq hərraca çıxarılacaq.

Valyuta.az xəbər verir ki, hərraca çıxarılan avtomobillər əsasən 2014-cü il buraxılışıdır.

Onlar arasında “Hyundai Santa Fe”, “Toyota Prado”, “Toyota LC 200” və “Audi A6” modelləri yer alır. “Hyundai Santa Fe” modellərinin ilkin satış qiymətləri 14 109,30 manatdan başlayaraq 21 862,80 manata qədər dəyişir. “Toyota Prado” avtomobilləri 27 162,00 - 37 101,60 manat, “Toyota LC 200” modelləri isə 39 042,00 - 45 934,20 manat aralığında təklif olunur. “Audi A6” markalı avtomobilin ilkin satış qiyməti 19 963,80 manatdır. Satış şərtlərinə əsasən, hər bir nəqliyyat vasitəsi üçün müəyyən olunmuş qiymətin 10 faizi qədər beh əvvəlcədən ödənilməlidir.

Hərracda iştirak etmək istəyən hüquqi şəxslər təsis sənədlərinin notarial qaydada təsdiqlənmiş surətlərini, fiziki şəxslər isə şəxsiyyəti təsdiq edən sənədin surətini təqdim etməlidirlər. Əgər hərracda nümayəndə vasitəsilə iştirak ediləcəksə, etibarnamə təqdim olunmalıdır. Bundan əlavə, “BOS Shelf İnternational FZCO” şirkətinin hesabına behin köçürüldüyünü təsdiqləyən ödəniş sənədi də təqdim olunmalıdır. Sənədlər ən geci hərracın başlanmasına üç bank günü qalanadək Əmlak Məsələləri Dövlət Xidmətinin Əmlak Xidmətləri Məkanına təqdim edilməlidir.

Nəqliyyat vasitələrinə baxış imkanları hərracın keçirilməsinə qədər hər həftənin cümə günü saat 14:00-dan 16:00-dək təşkil olunur. 

Mayya Hüseynova