“Lider bürclər var” – Azərbaycanda işə qəbul edilən şəxsin bürcünə baxırlar?

Dünya təcrübəsində var ki, bəzi şirkətlər işçiləri işə götürən zaman onların bürclərinə də fikir verirlər. “Hər bürcün özünün işlədiyi sahə olmalıdır” deyə yanaşmalar var. Bir sahədə çalışan bürcün başqa işdə uğursuz olması haqqında fikirlər söylənilir. Bürclər iş həyatında nə qədər əhəmiyyətli rol oynayır? Azərbaycanda işə qəbul zamanı bürcə fikir verirlərmi?

Bu barədə Valyuta.az-a danışan HR Hunter şirkətinin qurucusu, İnsan Resursları üzrə konsultant İlkin Mirzəzadə bildirib ki, son vaxtlar bürclərin həyatda, karyerada rolu barəsində kifayət qədər məqalələr yayılmağa başlayıb və ölkəmizdə astrologiyaya maraq artıb:
“İşçini işə götürən zaman bürclərə diqqət yetirilməsi fikri ilə razı olduğum və razı olmadığım məqamlar var. Bəzi məqamlarda razılaşıram ki, həqiqətən lider bürclər var. Çünki işini peşəkar səviyyədə görən şəxslərin bürclərinə baxdıqda onların müəyyən kateqoriyaya aid olduğu görülür. Məsələn, qoç, tərəzi və s. bürcləridir. Bu danılmaz faktdır və bütün dünya liderlərinə, milyarderlərinə baxdıqda görürük ki, bu bürclərdəndir və heç də təsadüf deyil. Lakin hər bir prosesi, hər bir incəliyi bunu üzərinə qurmaq düzgün deyil. Çünki biz hər bir iş prosesini buna bağlasaq, öz işimiz də axsayar”.

Konsultant qeyd edib ki inkişaf etmiş ölkələrdə müxtəlif təcrübələrdən istifadə edirlər: “Dünyada belə bir təcrübə var ki, inkişaf etmiş ölkələrdə bundan istifadə edirlər. Psixodiaqnostika, insan tanıma və s. testlər kimi təcrübələr var. Hətta şəxsin instinktlərindən xüsusi aparatlar vasitəsilə işçinin iş yerinə nə qədər sadiq qalacağı, nə qədər uzun müddət işləyəcəyi belə ölçülür. İşəqəbul bu dəqiqə bütün dünyada çox inkişaf edib. Azərbaycanda təbii ki indi-indi bunun ilkin variantlarının yayılması çox normaldır və çox da doğrudur. İnkişaf etmiş dünyada bundan istifadə halı varsa, deməli, bizdə də çoxalacaq. Bunu normal qəbul etmək lazımdır. İndiki insanlar artıq iş seçimi edərkən sadəcə iş olsun deyə seçmir, yəni, hisslərinə, iş yerindəki şəraitə, ona olan davranışa və s. çox diqqət yetirirlər. İşə götürənin də bürclərə və digər amillərə görə seçməsi tamamilə normaldır, sadəcə biz belə ifadələri indi-indi eşidirik deyə bizə absurd gəlir”.

Əvəz Həsənov