“Sosial Müdafiə Fondunun sədri bildirir ki, pensiya yaşının artırılması ilə bağlı təkliflərə yer yoxdur. Səbəb kimi bunu göstərir ki, hazırda pensiya alanların 97 faizdən çoxu 12-35 il arası pensiya alır”.

Valyuta.az xəbər verir ki, bu barədə fikirlərini açıqlayan iqtisadçı ekspert Rövşən Ağayev, rəsmi məlumat kimi etibarlılığına şübhə etmək istəmədiyini diqqətə çatdırıb.

“Amma qurumdan rica edək ki, həmin informasiyanın ardınca bəzi məlumatları da ictimaiyyət üçün açıqlasın. Məsələn, hazırda pensiya alanların yaş strukturu necədir? 50 yaşadək, 50-55, 55-60, 60-65, 65-70, 70-75 yaş intervallarında, 75 yaşdan yuxarı pensiya alanların sayı nə qədərdir? Hazırda pensiya alanların neçə nəfəri güzəştli və erkən pensiya hüququ qazanmış şəxslərdir, hansı hissəsi normal yaş tələbilə pensiyaya çıxanlar? Bu məlumatlar olmadan açıqlanan 12-35 il pensiya almaqla bağlı arqument əsaslı deyil”, - deyə ekspert vurğulayıb.

Onun fikrincə, erkən yaşda pensiya hüququ qazananların sayı nə qədər çox olacaqsa, pensiyanı daha uzun müddətə alanların da xüsusi çəkisi yüksək olacaq: 

“Pensiyanı alma müddətilə pensiya yaşı arasında əlaqə bialvasitə normal yaşda pensiya hüququ qazananlara münasibətdə maraqlıdır - bütün pensiya alanlara deyil...”