2020-ci ilin sonuna manatla pul bazası 11.6% artaraq ilin sonuna 13.6 mlrd. manat təşkil edib. 

Mərkəzi Bankdan Valyuta.az-a verilən xəbərə görə, manatla pul bazasının struktur elementi olan dövriyyədəki nağd pulun həcmi (bank sistemindən kənarda nağd pul, bankların kassalarında və bankomatlarda olan pullar) 13.8% artıb, manatla müxbir hesabların qalığı isə 1.2% azalıb.

Mərkəzi Bank tərəfindən pandemiya şəraitində iqtisadiyyata zəruri nöqtəvi likvidlik dəstəyinin göstərilməsi də pul təklifinə təsir edib. Ümumilikdə, pul siyasətinin dəyər baxımından yumşaldılmağa başlandığı 2018-ci ilin əvvəlindən bəri pul təklifi 63% artıb.

İl ərzində geniş pul kütləsi (M3) 1.1% artıb və dövrün sonuna 29.2 mlrd. manat olub. Manatla geniş pul kütləsi (M2) isə 11.3% artaraq ilin sonuna 20.3 mlrd. manat təşkil edbr. M2-nin strukturunda dövriyyədə olan nağd pul, tələb olunana kimi əmanət və depozitlər və müddətli əmanət və depozitlər fərqli dinamika nümayiş etdirib.

Hesabat ilində geniş mənada pul kütləsinin tərkibinə daxil olan nağd pul kütləsi 13.4% (M2-də xüsusi çəkisi 53.1%), manatla tələb olunanadək əmanət və depozitlər 20.3% artıb (M2-də xüsusi çəkisi 34.9%), müddətli əmanət və depozitlər isə 14.1% (M2-də xüsusi çəkisi 12%) azalıb. 

Manatla tələb olunanadək əmanət və depozitlərin yüksək templə artması iqtisadiyyatda nağdsızlaşma prosesinin getdiyini göstərir. 

Rövşən Ziya