Dövlət Statistika Komitəsinin açıqladığı məlumatlara görə, son 10 ildə Azərbaycanda iribuynuzlu mal-qaranın sayı 189,8 min baş, qoyun və keçilərin sayı 1 milyon 584,8 min baş, donuzların sayı 1,3 min baş, atların sayı 22,3 min baş, eşşəklərin sayı 25,1 min baş, qatırların sayı 100 baş azalıb. 

Azərbaycanda heyvandarlığa marağın azalmasının səbəbləri nələrdir? Növbəti illərdə bu sahəni nələr gözləyir?

Valyuta.az-a danışan kənd təsərrüfatı üzrə ekspert Vahid Məhərrəmli deyir ki, heyvanların baş sayının azalması ona görə baş verir ki, Azərbaycanda təbii biçənək ərazilərinin, örüş sahələrinin çoxu əkinə verilib:

“Azərbaycanda həm örüş sahələri, həm də biçənək sahələri azalıb. Digər tərəfdən də yem istehsalı da kəskin şəkildə aşağı düşüb. Azərbaycanda ot istehsalı tələbatdan iki dəfə aşağıdır. Digər yem növlərinin istehsalı isə ümumiyyətlə çox zəifdir. Məsələn, yem çuğundurunun istehsalı tələbatın bir faizi qədər də deyil. Hətta elə yemlər var ki, Azərbaycanda istehsal edilmir. Yemin olmaması heyvanların baş sayının azalmasına gətirib çıxarır. Azərbaycan 2018-ci ildə hər il 2 milyon ton qüvvəli yem istehsalı edilməsi ilə bağlı Dövlət Proqramı qəbul etmişdi. Amma təəssüf ki, ildə 150 min ton yem istehsal olunmuşdu. Heyvandarlığı artırmaq üçün yem istehsalını, təbii biçənək sahələrini artırmaq lazımdır”.

Ekspert bildirdi ki, yaxın zamanlarda yemçiliyi inkişaf etdirməsək, heyvanların da sayı azalacaq, ətin və südün də qiyməti artacaq:

“Ət və süd idxalı artacaq, amma idxal ətin və südün qiymətinə təsir edəcək. Dünya bazarlarında hazırda südün qiyməti Azərbaycandan iki dəfədən çox ucuzdur. Burada daşınma xərcləri, digər xərclər və monopoliya da bazara təsir edir”.

Əvəz Həsənov