Bu ilin yanvar-iyul aylarında Azərbaycanın dövlət büdcəsinin xərcləri 19 milyard 458,4 milyon manat olub.

Valyuta.az Dövlət Statistika Komitəsinin açıqladığı məlumatlara istinadən xəbər verir ki, büdcədən ən çox vəsait iqtisadi fəaliyyət sahəsinə ayrılıb. Belə ki, bu dövrdə iqtisadi fəaliyyətə 4 milyard 108,9 milyon manat xərclənib ki, bu da ümumi xərclərin 21,12 faizini təşkil edib.

Bu dövrdə büdcədən ən çox vəsait xərclənən ikinci sahə müdafiə və milli təhlükəsizlik sahəsi olub. Bu sahəyə 3 milyard 481,6 milyon manat xərclənib ki, bu da ümumi xərclərin 17,89 fazini təşkil edib.

Üçncü yerdə isə 2 milyard 709,9 milyon manat xərc ilə ümumi dövlət xidmətləri tutub. Ümumi dövlət xidmətlərinə çəkilən xərclər ümumi xərclərin 13,93 faizini təşkil edib.

Bunlarla yanaşı təhsil sahəsinə 2 milyard 496,5 milyon manat (12,83 %), məhkəmə hakimiyyəti, hüquq - mühafizə və prokurorluq sahəsinə 1 milyard 421,4 milyon manat (7,3 %), səhiyyə sahəsinə 1 milyard 35,1 milyon manat (5,32 %), sosial müdafiə və sosial təminat sahəsinə 2 milyard 410,4 milyon manat (12,39 %), mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət sahəsinə 257 milyon manat (1,32 %), mənzil və kommunal təsərrüfatı sahəsinə 133,1 milyon manat (0,68 %), kənd təsərrüfatı sahəsinə 566,5 milyon manat (2,91 %), ətraf mühitin mühafizəsi sahəsinə 160,7 milyon manat (0,83 %), əsas bölmələrə aid edilməyən xidmətlər sahəsinə isə 677,3 milyon manat (3,48 %) xərclənib.

Əvəz Həsənov