Pərvanə Həsənova
    İnsan Resursları mütəxəssisi 

İstedadların saxlanılması və idarəolunması hazırda İR sahəsində çalışan əməkdaşların və rəhbər heyətin marağında olan ən vacib məsələlərdən biridir. Çünki müəssisə “əvəzolunmaz” hesab etdiyi, “kritik” vəzifələrdə çalışan əməkdaşları itirməmək üçün nə etməli olduğunu daima düşünür. Buraya müxtəlif mükafatlar, bonuslar, benefitlər, “teambuildinq”lər, səhmlər, vəzifə artımları, əlavə üstünlüklər, güzəştlər, sığortalar, tədbirlər - ümumiyyətlə maddi və qeyri-maddi dəstək və s. daxildir.

Bütün bunları tətbiq etmək üçün komanda işi lazımdır, çünki işçi məmnuniyyəti ölçülməsindən tutmuş müxtəlif analizlər bu məsələdə görüləcək işlərin planlanmasına gətirib çıxarır. Bütün planlanan və görülən işlərin nəticəsində isə bir məqam var ki, o da işçi bağlılığının artmasına, iş keyfiyyətinin yüksəlməsinə və biznesin strateji məqsədlərinə çatmağına birbaşa təsir göstərməsinə gətirib çıxarır. Bu məqam işçi xoşbəxtliyidir ki, bütün tədbirlər yekunda bu nəticəni almaq üçün həyata keçirilir. Çünki, biznesin müvəffəqiyyətində əsas rolu düzgün idarəetmə və xoşbəxt çalışan əməkdaşlar tutur.

Cari ilin mart ayında Böyük Britaniyada Warwick Universiteti tərəfindən aparılan araşdırmaların birində özünü xoşbəxt hiss edən işçilərin 12 %-nin daha məhsuldar çalışdığı hesablana bilib. Sadə dildə desək, təəccüblü deyil ki, işdə özünü xoşbəxt his edən, iş-həyat balansı normada olan işçilər öz işlərini daha yaxşı görməyə, dincəlmək üçün fasilələrdən az istifadə etməyə, işləri vaxtında keyfiyyətlə icra etməyə, yeni təkliflər və layihələr üzərində işləməyə can atırlar. Xüsusən müəssisədə performans dəyərləndirmə, təlimləndirilmə, karyera inkişaf planı, istedadların idarə edilməsi işləri sistemli şəkildə görülürsə, həmin işçilərdən keyfiyyətli iş təhvil almaq heç də təəccüblü deyil.

Bütün bu işlər İnsan resursları sahəsində fəaliyyət göstərən əməkdaşların icra etdiklərinin bir hissəsidir. Elə buna görə də, İR biznesə birbaşa təsir göstərə bilir. Hər nə qədər İnsan resurslarının müəssisəyə verdiyi xeyiri ölçmək çətin olsa da, potensial işçinin işə götürülməsindən tutmuş bütün mərhələlərdə onun yanında olan, işçi ilə işəgötürən arasında körpü rolunu oynayan İR sahəsində çalışan əməkdaşların rolları danılmazdır. Hazırda İnsan Resurslarının bütün modullarının müəssisədə tətbiq edilməsi, istedadlı əməkdaşların saxlanılması, xoşbəxt iş mühitinin formalaşdırılması yerli bazarda rəqabətə davamlı olmaq üçün hədəflənmiş müəssisələrdə daha yaxşı inkişaf edib. 

Beynəlxlaq iş mühitində işçinin uğurunu müəssisənin uğuru kimi qiymətləndirən “Google”, “Nike” kimi iri şirkətlər işçilərin rifahının müəssisənin rifahına çox müsbət təsir etdiyinin fərqində olduqları üçün onlara hər cür şərait yaradaraq, loyallığa nail ola bilirlər.

İşçilər şirkətdə xoşbəxt olmalıdır, özünü dəyərli hiss etməlidir, iş-həyat balansı normada olmalıdır ki, hər hansı loyallıqdan söhbət gedə bilsin.