“Azərbaycan nefti üçün bizim hədəf bazarımızı əsasən Aralıq dənizi hövzəsi təşkil edir. Lakin, pandemiya dövründə Aralıq dənizi hövzəsində məhsula tələbat azaldığından Azərbaycan nefti Asiya, xüsusilə Uzaq Şərqi Asiya, Cənub-Şərqi Asiya ölkələrinə də nəql olunurdu”.

Valyuta.Az xəbər verir ki, bunu Oxu.Az-a açıqlamasında Dövlət Neft Şirkətinin (SOCAR) ictimaiyyətlə əlaqələr və tədbirlərin təşkili idarəsinin rəis müavini İbrahim Əhmədov deyib.

O bildirib ki, bunun nəticəsində SOCAR müəyyən dərəcədə itkilərini azaltmağa və ölkə üçün qazancını artırmağa nail olub:

“Bütün bunlar gündəlik verilən qərarlar əsasında baş tutur. SOCAR Trading hər il yüzlərlə istiqamətdə neft və neft məhsullarının nəqlini və satışını həyata keçirir. Təkcə Azərbaycanın deyil, üçüncü tərəflərin də neft məhsullarını alaraq müxtəlif qitələrdəki ölkələrə nəql edir. Bunlar əsasən spot (birdəfəlik) və qısa müddət üçün qərarlaşdırılan satışlardır. Lakin, bəzi hallarda SOCAR Trading həm də tenderlərdə iştirak edir. Bununla yanaşı uzunmüddətli müqavilələr də bağlanır”.

İbrahim Əhmədov əlavə edib ki, hazırda Belarusa neftin çatdırılması ilə bağlı bir illik müqavilə imzalanıb. Bunlar da birdəfəlik (spot) satışları əhatə edir və daha əvvəl isə bir il ərzində Belarusa təxminən bir milyon tona yaxın neft satılıb.

O qeyd edib ki, uzunmüddətli müqavilələrin olub-olmaması şirkətin biznes effektivliyinin göstəricisi yaxud bunun əksinin ifadə etmir:

“Həm spot şərtlər, həm də uzunmüddətli şərtlər əsasında satışlar baş tuta bilər. Hər ikisinin özünəməxsus üstünlükləri mövcuddur. Burada kommersiya baxımından fərq o qədər də böyük deyil. Bütün hallarda demək olar ki, bizim satış bazarımız mövcuddur”.