“Pərakənda satış həcmi ilə bağlı rəsmi məlumatlar açıqlanıb, maraqlı detallar var: Dövlət Statistika Komitəsinin yaydığı məlumata görə, 2020-ci ildə pərakəndə ticarət şəbəkəsində istehlakçılara 40,2 milyard manatlıq, o cümlədən 21,7 milyard manatlıq ərzaq məhsulları, içkilər və tütün məmulatları, 18,5 milyard manatlıq qeyri-ərzaq malları satılıb”.

Valyuta.Az xəbər verir ki, bunu iqtisadçı-ekspert Natiq Cəfərli deyib.

O bildirib ki, bir ölkədə pərakəndə satış dövriyyəsinin yarısına yaxını – 19 milyard 516 milyon manatını sırf ərzağa (içki və tütün məmulatlarına çıxanda) xərclənirsə, həmin ölkə kasıb ölkədir:

“Normalda varlı, inkişaf etmiş ölkələrdə ticarət dövriyyəsinin 12-20 faizi arası ərzağa xərclənilir. Daha bir maraqlı detal: 2019-cu ildə avtomobil yanacağının (benzin və dizel) satış həcmi 2 milyard 310 milyon manat olub. 2019-cu ilin məlumatlarına əsasən, ölkədə 1 milyon 400 min nəqliyyat vasitəsi qeydiyyatda olub. Tutalım, bunların hər biri işlək vəziyyətdədirsə, il ərzində hər avtomobil 1650 manatlıq yanacaq istehlak edib, yəni günə 4 manat 52 qəpik.

2020-ci ildə isə avtomobil yanacağının (benzin, dizel) satış həcmi 2 milyard 40 milyon manat olub. 2020-ci ildə ölkəyə 53729 avtomobil gətirilib. Onları nəzərə almasaq (çünki əsas idxal il sonuna tasadüf edib, deməli istehlaka ciddi təsiri olmayıb) il ərzində hər avtomobil 1457 manatlıq yanacaq istehlak edib, yəni günə 4 manatlıq.

Ciddi sual yaranır: 2020-ci ilin 9 ayını ölkə sərt karantin rejimində keçirib, rayonlararası gediş-gəliş məhdud olub, rayon-şəhərlərarası sərnişindaşıma işləməyib, Bakıda həftələrlə küçələrdə maşın olmurdu, məktəblər, universitetlər bağlı, sərhədlər bağlı (bunun da ciddi təsiri var. Məsələn, 2019-cu ildə xaricə, əsasən də Gürcüstana maşınla səfər edənlərin sayını nəzərə alsaq, onların ciddi yanacaq istehlak etdiyini təsəvvür etmək çətin deyil) – bütün bunlara rəğmən yanacaq satışının həcmi 2019-cu ilə nisbətən 2020-cı ildə cəmi 270 milyon manat azalıb – bu necə ola bilər?! Bunun ciddi izahı varmı?!

Yeganə ehtimalın odur ki, 2020-ci ildə benzin satışının leqallaşması artıb, əvvəllər cibə gedən, indi qeydiyyata düşüb, yaxşı, əgər belədirsə, illərdir cibə gedənlərə görə məsuliyyəti kim daşıyır?! Bununla bağlı nədən araşdırma aparılmır?!”