"Aldrin layihəsi": "Meta" hamımızın məlumatlarını Çinləmi paylaşır?

ABŞ Senatında "Facebook" barədə sualları cavablandıran keçmiş rəhbər şəxsin açıqlamaları sosial media nəhəngi "Meta" ilə bağlı ciddi iddiaları gündəmə gətirib. 

Valyuta.az xəbər verir ki, iddialara görə, "Meta" rəhbəri Mark Zukerberq "WhatsApp" yazışmaları da daxil olmaqla istifadəçilərin məxfi məlumatlarını Çinə ötürməkdə maraqlı olub. 

Çin bazarına giriş uğrunda hər şey gözə alınır

ABŞ və Çin arasında sürətlə alovlanan ticarət müharibəsi fonunda, 1,5 milyardlıq Çin əhalisi hələ də ABŞ-ın texnologiya şirkətləri üçün cəlbedici bazar olaraq qalır. "Meta"nın Çin bazarına daxil olmaq üçün hər cür riski gözə almağa hazır olduğu, bu son hadisələrlə bir daha ortaya çıxıb.

ABŞ Senatının Ədalət Komitəsinin Cinayət və Terrorla Mübarizə Alt Komitəsində çıxış edən "Meta"nın keçmiş rəhbər şəxslərindən Sara Vinn-Vilyams şirkətin Çinlə əlaqələrinə dair açıqlamaları ilə gündəmə gəlib. O, Mark Zukerberqin sosial şəbəkəni Çin bazarına açmaq üçün istənilən güzəştə hazır olduğunu və bu çərçivədə ABŞ vətəndaşlarının məlumatlarının ifşa edilməsinin belə müzakirəyə açıq olduğunu bildirib.

"Aldrin layihəsi" və gizli məlumat ötürmələri

Vinn-Vilyams həmçinin bildirib ki, "Meta" daxilində bu təşəbbüs "Aldrin layihəsi" olaraq adlandırılıb və yalnız məhdud bir qrupun girişinə açıq olub. Onun sözlərinə görə, şirkət ABŞ ilə Çin arasında "rəqəmsal bir boru xətti" yaratmağa çalışıb və bu xətt vasitəsilə istifadəçi məlumatları birbaşa Çin Kommunist Partiyası ilə paylaşılır.

Məlumat təhlükəsizliyi və gələcək risklər

"Çin və ya ABŞ mənim şəxsi məlumatlarımla nə edə bilər ki?" sualı bəzi istifadəçilərə bəsit görünə bilər. Lakin "WhatsApp" mesajlarınızda yer alan ən kiçik bir "problematik" ifadənin belə gələcəkdə xarici səyahətlərinizdə problemlərə yol aça biləcəyi, hətta sərhəd keçidində ölkəyə girişinizin əngəllənə biləcəyi unudulmamalıdır. Xüsusilə də ABŞ və ya Çin mənşəli bir şirkətlə rəqabət aparan iş adamları üçün bu məlumatların sızması, ticarət sirrlərinin rəqib firmalara ötürülməsi riski realdır.

Nəticə: Silahsız casusluq dövrü

Nəticə etibarilə, kommersiya casusluğu və məlumat təhlükəsizliyi müasir dövrdə cəmiyyətləri silahsız şəkildə sarsıdan bir vasitəyə çevrilib. "Meta" və digər texnologiya nəhənglərinin istifadəçi məlumatları üzərində qurduğu strateji əməkdaşlıqlar, milli təhlükəsizliklə yanaşı fərdi azadlıqları da ciddi şəkildə təhdid edir.

Paşa Məmmədli