ABŞ-ın "Ford Motor" şirkəti prezidenti Donald Trampın tətbiq etdiyi yeni gömrük rüsumlarına cavab olaraq Çinə yönəlmiş avtomobil tədarükünü müvəqqəti dayandırıb.

Valyuta.az xəbər verir ki, bu həftə ərzində şirkət ABŞ-ın Miçiqan ştatında istehsal olunan "F-150 Raptor", "Mustang" və "Bronco" SUV modelləri ilə yanaşı, Kentukki ştatında istehsal edilən "Lincoln Navigator" avtomobillərinin də Çinə göndərilməsini dayandırıb.

Bildirilib ki, Çin tərəfindən tətbiq olunan cavab rüsumları nəticəsində bu modellərin üzərinə 150 faizə qədər əlavə vergi qoyulub. Məlumata görə, "Ford" şirkəti məsələyə dair rəsmi şərh verməyib.

ABŞ avtomobil istehsalçıları Trampın vaxtaşırı tətbiq etdiyi gömrük rüsumlarının yaratdığı təsirləri minimuma endirmək üçün alternativ yollar axtarır. Bu ticarət siyasətinin avtomobil istehsalçılarının və hissə təminatçılarının mənfəətinə mənfi təsir göstərəcəyi proqnozlaşdırılır.

Hesabatda qeyd edilir ki, şirkət tərəfindən ABŞ-da istehsal olunan mühərrik və transmissiyaların Çinə ixracı davam edəcək. Çin istehsalı olan "Lincoln Nautilus" modelinin də yüksək rüsumlara baxmayaraq, göndərişləri davam etdiriləcək.

Sərvanə Rəmixanova