"Meta"nın baş direktoru Mark Zukerberqin 2022-ci ildə "Facebook" platformasında istifadəçi aktivliyini artırmaq üçün radikal bir ideya irəli sürdüyü ortaya çıxıb. 

Valyuta.az xəbər verir ki, Antitrest məhkəməsi zamanı üzə çıxan şirkət daxili yazışmalarında Zukerberqin istifadəçilərin dost siyahılarını tamamilə sıfırlamağın platformadakı qarşılıqlı əlaqəni artıracağını düşündüyü məlum olub.

"Hamının dost siyahısını sıfırlayaq" təklifi

"The Verge" nəşrinin müavin redaktoru Aleks Hitin məhkəmə salonundakı müşahidələrinə əsasən, Zukerberq bu təklifi şəxsən dilə gətirib. O, "Facebook"un mədəni əhəmiyyətinin azaldığını və belə bir dəyişikliklə istifadəçilərin platformada daha aktiv ola biləcəyini ifadə edib.

Lakin belə bir addımın istifadəçi itkisinə səbəb ola biləcəyini anlayan Zukerberq bu ideyanı əvvəlcə daha kiçik bir ölkədə sınaqdan keçirməyi və tədricən tətbiq etməyi təklif edib. Onun elektron məktublarında "Instagram" və "WhatsApp" nə qədər uğurlu olsa da, əgər "Facebook" zəifləsə, "Meta"nın ciddi çətinliklərlə qarşılaşacağını düşündüyü açıq şəkildə görünür.

Rəhbərlik arasında fikir ayrılığı

"Business Insider"ın məlumatına görə, "Facebook" prezidenti Tom Allison Zukerberqin bu təklifinin real həyata keçirməyə uyğun olub-olmadığından əmin olmadığını bildirib. O, "Facebook" dostluqlarının "Instagram" kimi digər platformalardakı funksiyalarla əlaqəli olduğunu və belə bir dəyişikliyin riskli ola biləcəyini qeyd edib.

Zukerberq həmçinin profillərin izləyici modelinə keçirilməsinin nə qədər çətin ola biləcəyini sorğulayıb. ABŞ Federal Ticarət Komissiyasının vəkilinin məhkəmədə bu ideyanı xatırlatması zamanı o, "Bildiyim qədərilə biz bunu heç vaxt etmədik" cavabını verib.

"Facebook" azalan populyarlığa qarşı mübarizə aparır

"Meta"nın "Facebook"un azalan populyarlığından narahat olduğu artıq açıq şəkildə görünür. Hərçənd Zukerberqin dost siyahılarını sıfırlama təklifi həyata keçirilməyib, şirkət xəbər lentini dostlara yönəlmiş yeni bir bölmə ilə yenidən quraraq istifadəçi təcrübəsini dəyişdirməyə çalışıb.

Zukerberq 2024-cü ildən etibarən "Facebook"un öz orijinal sosial şəbəkə kimliyinə daha çox diqqət ayıracağını bildirib. Lakin bu dəyişikliklərin platformaya əvvəlki aktivlik səviyyələrini qaytarıb-qaytarmayacağı hələlik qeyri-müəyyən olaraq qalır.

Paşa Məmmədli