2024-cü ildə "qara internet" adlandırılan platformalarda 800 milyon oğurlanmış şifrənin yayımlandığı və bu səbəbdən şifrə təhlükəsizliyinin ciddi risk altında olduğu bildirilir.

Valyuta.az xəbər verir ki, "IBM X-Force" tərəfindən hazırlanmış son hesabata görə, məlumat oğurlayan zərərli proqramlar əsasən saxta e-poçtlar vasitəsilə daha geniş şəkildə yayılır. 2025-ci ilin əvvəlində bu cür proqramların yayılma hallarının 2023-cü illə müqayisədə 180 faiz artdığı qeyd olunur. Yəni istifadəçi məlumatlarını hədəfləyən proqramlar adətən gözdən yayınır, lakin geniş şəkildə yayılır.

800 milyon şifrə onlayn şəkildə ifşa edilib

Hesabatda hakerlərin bu proqramları saxta "Google" reklamları, vebsayt ziyarətləri zamanı avtomatik yüklənən zərərli fayllar və proqram təminatı təchizat zəncirinə sızmaq kimi üsullarla yaymağa davam etdiyi bildirilir. Bu elanlarda yüzlərlə hesab məlumatının yer aldığı, onlayn mühitdə paylaşılan ümumi şifrə sayının isə 800 milyonu keçdiyi qeyd olunur.

Mütəxəssislər bu məlumatların kibercinayətkarların artıq sistemlərə sızmaq əvəzinə birbaşa giriş üçün istifadəçi məlumatlarına üstünlük verdiklərini göstərdiyini bildirirlər. Yayımlanan məlumatlar şifrələrin artıq təkbaşına effektiv təhlükəsizlik vasitəsi olmadığını bir daha sübut edir. Mütəxəssislər iki faktorlu identifikasiya sistemlərinin belə kiber hücumçular tərəfindən aşılmasının mümkün olduğunu vurğulayır. İstifadəçilərə şifrələrini mütəmadi olaraq yeniləmək və hesablarını əlavə təhlükəsizlik tədbirləri ilə qorumaq tövsiyə olunur.

Sərvanə Rəmixanova