“Meta” “İnstagram”da şərh yazmağı asanlaşdırmaq üçün süni intellekt dəstəyi ilə işləyən yeni funksiyanı sınaqdan keçirməyə başlayıb. 

Valyuta.az xəbər verir ki, yeni sistem istifadəçilərə paylaşımlara şərh yazarkən “Meta AI”-dən yardım almaq imkanı verir. Hal-hazırda bu funksiya yalnız məhdud sayda istifadəçi üçün aktivdir.

Yeni xüsusiyyət sayəsində istifadəçi paylaşıma baxdıqda, nə yazacağını düşünməyə ehtiyac qalmır – süni intellekt avtomatik şəkildə şərh təklifləri təqdim edir. Şirkət bu yolla “İnstagram”dakı istifadəçi aktivliyini daha praktik və axıcı hala gətirməyi hədəfləyir.

X istifadəçisi Jonah Manzano bu funksiyanın necə göründüyünü paylaşaraq bildirib ki, şərh yazma sahəsinin yanında yeni bir qələm ikonu əlavə edilib. Bu ikon vasitəsilə “Meta AI” aktivləşir və paylaşılan görüntünü analiz edərək üç fərqli şərh təklifi verir. İstifadəçi bu təklifləri yeniləyərək alternativ variantlar da əldə edə bilər.

Meta hələlik bu funksiyanın hansı istifadəçilərə təqdim edildiyi və nə vaxt geniş şəkildə istifadəyə veriləcəyi barədə açıqlama verməyib. Şirkət daha əvvəl “Facebook”da da AI əsaslı şərh xülasəsi funksiyalarını test etmişdi.

Bəzi istifadəçilər bu yeniliyi "süni və mənasız" hesab etsələr də, digərləri üçün funksiyanın istifadəsi rahatlıq və zaman qənaəti baxımından faydalı ola bilər. “Meta”nın bu sistemi daimi olaraq tətbiq edib-etməyəcəyi isə hələ ki, bəlli deyil.

Sərvanə Rəmixanova