“PAŞA Bank”ın Gürcüstanda törəmə bankı “PASHA Bank Georgia”nın rəhbərliyinin 2024-cü il üzrə gəlirləri məlum olub. 

Valyuta.az-ın əldə etdiyi məlumata görə, törəmə bank ötən il əsas rəhbər heyətinə 3 milyon 347 min lari (2,05 mln. AZN) ödəniş edib. Bu isə 2023-cü ilə nisbətən 26% və 692 min lari çoxdur. 2023-cü ildə bu rəqəm 2 milyon 655 min lari təşkil edib. 

Qeyd edək ki, bankın əsas rəhbər heyətinə Müşahidə Şurasının 5 üzvü və İdarə Heyətinin 4 üzvü olmaqla 9 nəfər daxildir. 

Bankın Müşahidə Şurasının sədri Rövşən Allahverdiyev, İdarə Heyətinin sədri isə Ramil İmamovdur. Başqa sözlə, Rövşən Allahverdiyev və komandasının bankdan orta illik qazancı 371,8 min lari (227,9 min AZN), orta aylıq qazancı isə 31 min lari (19 min AZN) təşkil edib. 

Qeyd edək ki, 2013-cü ildə Gürcüstan Mərkəzi Bankı “PASHA Bank Georgia”ya fəaliyyət lisenziyası verib. Bankın səhmlərinin 85.06%-i “PAŞA Bank”a, 14.94%-i isə “PAŞA Holdinq”ə məxsusdur.