Hazırda mövsümlə bağlı bazarlarda kənd təsərrüfatı məhsullarının bolluğu müşahidə edilir. Lakin son günlər əhali hava şəraitinin qeyri-sabit keçməsinin kənd təsərrüfatı məhsullarına mənfi təsir edəcəyi və məhsul qıtlığının yaranacağı, bunun isə qiymət artımına təsirsiz ötüşməyəcəyi qənaətindədir.

Mövcud hava şəraiti kənd təsərrüfatında məhsuldarlığa necə təsir edəcək?

Valyuta.az Cebhe.info-ya istinadən xəbər verir ki, kənd təsərrüfatı üzrə ekspert Vahid Məhərrəmov açıqlamasında, hazırda bəzi məhsullarda qiymət artımının olmasının hava şəraitinə heç bir aidiyyatının olmadığını bildirib. 

Ekspertin sözlərinə görə, bu gün istixana məhsullarından daha çox istifadə edilir: 

“Əsasən tərəvəz, pomidor, xiyar istixanada yetişdirilib. Faraş kartof da üstüörtülü təsərrüfatda yetişdirilib. Ümumiyyətlə, Azərbaycanda havanın dəyişməsindən asılı olmayaraq qiymətlər dəyişir. Yəni ölkədə hava şəraitindən asılı olmayaraq hər zaman qiymətlər yüksəkdir. Bu yaxınlarda qiymətləri Gürcüstan və Türkiyə ilə müqayisə etdik, həmin ölkələrdə kartofun qiyməti Azərbaycandan iki dəfə ucuzdur. Eləcə də soğanın, yerkökünün və digər məhsulların qiymətinin də Azərbaycandan aşağı olduğunu görürük. Azərbaycanın idxal etdiyi kərə yağını, bitki yağını Gürcüstan da idxal edir. Bizdə kərə yağı 20 dəfə bahadır. Azərbaycanda qiymətlər əksər ölkələrlə müqayisədə xeyli yüksəkdir”.

Hava şəraitinin dəyişməsinə gəldikdə, ekspert deyir ki, son 20 ildə qlobal iqlim dəyişikliyi baş verir və bunun kənd təsərrüfatına ciddi təsiri olacaq:

“Fermerləri, kəndliləri məlumatlandırmaq lazımdır ki, iqlim dəyişikliyi baş verəndə risklərin minimuma enməsi üçün hansı addımlar atsınlar. Yəni məhsuldarlıq, keyfiyyət aşağı düşməsin, bunun üçün hansı tədbirlər görülməlidir ki, həm keyfiyyət, həm də kəmiyyət baxımından məhsul itkisinə yol verilməsin. Dəfələrlə hökumətə təkliflər vermişik. Son vaxtlar müşahidə edirik ki, iqlim dəyişikliyi, havaların kəskin dəyişməsi, birbaşa kənd təsərrüfatına, məhsuldarlığa, keyfiyyətə təsir edir. Fermerlər çalışır ki, qiyməti artırmaqla bu ziyanı konpensasiya etsin. İqlim dəyişikliyi yalnız Azərbaycanda baş vermir”. 

Digər ölkələrdə də havanın kəskin dəyişdiyini deyən V.Məhərrəmov əlavə edib ki, necə olur ki, digər ölkələrdə məhsul istehsalında azalma baş vermir, məhsuldarlıq açağı düşmür, keyfiyyəti pisləşmir, ancaq bizim ölkədə baş verir:

“Çünki Azərbaycanda kəndliləri, fermerləri maarifləndirmirlər, onlarla risklərin azaldılması istiqamətində hansı addımları atmaqla bağlı informasiya vermirlər. Ona görə də belə qiymət artımlarının olacağını gösləyirik. Məhsuldarlığın azalması, keyfiyyətinin pisləşməsi və təəssüflər olsun ki, qiymətlərin artmasını müşahidə edəcəyik”.