Bu gün 10-12 iyun tarixlərində Bakı Ekspo Mərkəzində keçiriləcək “II Türk Ticarət Sərgisi – Türk Dövlətləri Ticarət və İnvestisiya Əməkdaşlıq Forumu və Sərgisi” ilə bağlı mətbuat konfransı təşkil olunub. 

Valyuta.az xəbər verir ki, tədbirdə İqtisadi İslahatların Təhlili və Kommunikasiya Mərkəzinin operatoru olduğu Azexport.az portalının rəhbəri Ayxan Qədəşov, Kiçik və Orta Biznesin Subyektləri və Klublarının Assosiasiyası (KOBSKA) İdarə Heyətinin sədri Ramin Şərifov, Türk Ticarət Sərgisi təşkilatçısı və ROK şirkətinin təsisçisi Aygün Əliyeva “II.Türk Ticarət Sərgisi” haqqında ətraflı məlumat verdilər.

Türk Ticarət Sərgisi təşkilatçısı və ROK şirkətinin təsisçisi Aygün Əliyeva çıxışında qeyd etdi ki, Türk Dövlətləri Təşkilatı ölkələrimiz arasında əməkdaşlığı gücləndirmək, dünya miqyasında varlığımızı artırmaq üçün bir çox mühüm addımlar atıb: “Biz çoxtərəfli əməkdaşlığımızı xarici siyasət və ticarətdən tutmuş enerji, yaşıl iqtisadiyyat, turizm, rəqəmsallaşma və hətta kosmik tədqiqatlara qədər 35 müxtəlif sahəyə genişləndirmişik". 

Qeyd olunub ki, 10-12 iyun 2025-ci il tarixlərində baş tutacaq sərgi KOBİA və İİTKM-in tərəfdaşlığı, KOBSKA və ROK Expo-nun təşkilatçılığı ilə keçiriləcək. Sərgidə 20-dən çox sahəni əhatə edən məhsul və texnologiyalar təqdim olunacaq, həmçinin B2B və françayzinq görüşləri təşkil ediləcək.

Forum çərçivəsində türk dövlətləri arasında iqtisadi əməkdaşlığın inkişafı, investisiya imkanları və ortaq brendlərin yaradılması istiqamətində müzakirələr aparılacaq. Sərgidə 11 ölkə iştirakçı, 20-dən çox ölkə isə ziyarətçi qismində təmsil olunacaq.

Sərvanə Rəmixanova