Vyetnamın İnformasiya və Rabitə Nazirliyi telekommunikasiya provayderlərinə pozuntuların araşdırılmasında yerli hakimiyyət orqanları ilə əməkdaşlıqdan imtina etdikləri üçün "Telegram" messencerini bloklamağı əmr edib. 

Valyuta.az xəbər verir ki, bu barədə “Reuters” hökumət sənədlərinə istinadən məlumat yayıb.

Nazirliyin xidmət provayderlərinə göndərdiyi sənəddə onlardan “Telegram"ın Vyetnamdakı fəaliyyətinin qarşısını almaq üçün tədbirlər görmək” və iyunun 2-dək nazirliyə məlumat vermələri xahiş olunur.

"Reuters"in adı açıqlanmayan nazirlik rəsmisinə istinadən verdiyi xəbərə görə, bu addım hökumətin müraciəti zamanı "Telegram"ın hökumətə istifadəçi məlumatlarını verməkdən imtina etməsindən sonra atılıb. Məlumatın cinayət araşdırmalarında istifadə edilməsi nəzərdə tutulurdu. 

Polisin məlumatına görə, 9600 "Telegram" kanalı və qruplarının 68%-i Vyetnam qanunlarını pozur. Sözügedən qanunlar sosial şəbəkələrdən qanunu pozan məlumatları, o cümlədən dələduzluq, narkotik vasitələrin qanunsuz dövriyyəsi və terrorizmlə bağlı məlumatları izləməyi, silməyi və bloklamağı tələb edir.

Paşa Məmmədli