Azərbaycan HR İnstitutunun təşkilatçılığı və Meditopia şirkətinin baş sponsorluğu ilə 20 May Beynəlxalq HR günü Bakıda Avropa İnsan Resursları Assosiasiyası, Maldiv, Türkiyə, Qazaxıstan, Özbəkistan, Qırğızıstan HR Assosiasiyalarının Prezidentləri, Vitse prezidentləri, İdarə Heyəti üzvləri, İnsan resursları üzrə baş direktorlar və HR peşəkarlarının iştirakı ilə “International HR Summit 2025” tədbiri keçirilib. 

Azərbaycan HR İnstitutunun təsisçisi və direktoru Emil Hüseynov bildirib ki, “International HR Summit 2025” tədbiri Azərbaycan Respublikası Prezidenti cənab İlham Əliyevin 2021-ci il 2 Fevral tarixli Sərəncamı ilə təsdiq edilmiş Azərbaycan 2030: sosial iqtisadi-inkişafa dair növbəti on il ərzində reallaşdırılması planlaşdırılan 5 Milli prioritetdən 3-cüsü olan “Rəqabətli insan kapitalı və Müasir innovasiyalar” prioritetini əsas alaraq dünyada insan resursları üzrə tətbiq olunan yeniliklər, bu sahədə müasir innovasiyalar və texnologiyanın inkişafı, fərqli təcrübələrin dialoqlar, müzakirələr və fikir mübadilələri ilə paylaşılmasını hədəfləyən qlobal Sammitdir.

20 May - Beynəlxalq HR günü keçirilən tədbirin ən mühüm tarixi hadisələrindən biri Bakıda “Türkdilli Dövlətlərin HR İttifaqı”nın ilk dəfə təsis edilməsidir.

Tədbirdə yerli və beynəlxalq təşkilatların insan resursları üzrə baş direktorları, dünyanın aparıcı HR Assosiasiyalarının rəhbərləri, dövlət qurumlarının vəzifəli şəxsləri vahid platformada insan resurslarının idarə olunması sahəsində baş verən son yeniliklər və gələcək gözləntilərdən bəhs etmişlər. Tədbir iştirakçıları qlobal insan resursları trendləri, rəqəmsal insan resursları və süni intellekt, İnsan resurslarında liderlik, öyrənmə və inkişafın perspektivləri və s. maraq kəsb edən mövzularla bağlı yeni fikir və təcrübələrə sahib olublar.

Qeyd etmək istəyirik ki, Azərbaycan HR İnstitutu tərəfindən “Baku International CEO Summit 2022”, “Global HR Summit 2023”, “World HR Summit 2024” və “COP29 Human Capital Forum” tədbirləri uğurla həyata keçirilib.