Son zamanların ən çox maraq doğuran məsələlərindən biri də, kriptovalyuta bazarı və artan qiymətləridir. 2009-cu ildən bəri fəaliyyətə başlayan sözügedən bazarda 4 mindən çox kriptovalyuta növləri var və hazırda ən bahalısı olan Bitkoinin son 24 saatdakı qiyməti 60 min dollardan bahadır. Sistemin necə işlədiyi hələ məlum olmasa da, gündəlik alış-veriş üçün bu növ valyutalardan istifadə edən müəssisələr var. Hətta ABŞ-ın bəzi yerlərində bankomatlar belə qurulub.

Valyuta.Az xəbər verir ki, artıq kriptovalyuta bazarına pul investisiya edənlərin sayı 100 milyonu keçib. Lakin bunların heç biri kriptovalyuta bazarına tam güvənc hissini yaratmamalıdır. 

Belə ki, hüquqşünas Kamran Xəlilov Valyuta.Az-a verdiyi açıqlamada, kriptovalyuta bazarının özlüyündə dalğalı xarakterə malik olduğunu bildirib:

“Bu gün 60 min dolları keçən Bitkoinin sabah 10 min dollardan aşağı düşməyəcəyinə heç kim zəmanət vermir. Çünki bazarın tənzimlənməsində nə dövlət, nə də təşkilati nəzarət mexanizmi yoxdur. Bundan başqa, sistemə il ərzində onlarla kiberhücumlar həyata keçirilir ki, bu da yatırım edənlərin pullarının güvəndə olmadığına ən bariz nümunədir. Yeri gəlmişkən, Beynəlxalq Valyuta Fondu (IMF) tərəfindən təqdim ediləın keçən ilki hesabatında dövlətlərin Mərkəzi Banklarınn pul siyasətindən və nəzarət mexanizmindən kənarda qalan kriptovalyutaların qeyri-leqal məqsədlər üçün istifadə edilə biləcəyi vurğulanmışdır”. 

Hüquqşünas, əmlakını satıb bu bazara yatırım edənlərin isə daha çox təhlükəli risk daşıdığını qeyd edib.

Rövşən Ziya