Çin avtomobillərinin əsas problemləri: Nələri bilmək lazımdır?

Çin avtomobilləri Avropa ölkələrində getdikcə daha populyar olur. Onlar sürücüləri tanınmış rəqiblərlə müqayisədə daha münasib qiymətləri və qabaqcıl texnologiyaları ilə cəlb edir.

Valyuta.az xəbər verir ki, təcrübəli mexanik Ceyson Makmanus "Express" nəşrinə Avropada satılan bütün Çin avtomobillərinin əsas problemləri barədə danışıb və belə avtomobil alarkən nələrə diqqət yetirilməli olduğunu izah edib.

Nəşrdə qeyd olunur ki, Çin avtomobilləri Böyük Britaniyada xüsusilə böyük populyarlıq qazanıb. Təkcə 2025-ci ilin ilk 10 ayında ölkəyə daxil olan 10 yeni Çin brendi bazarın 4,8%-ni ələ keçirib.

Makmanus bildirib ki, Avropa ölkələrində Çin avtomobili alan sürücülər müəyyən çətinliklərlə üzləşə bilərlər, xüsusən də avtomobilin təmirə ehtiyacı olduqda.

Mexanikin sözlərinə görə, ehtiyat hissələrinin məhdud əlçatanlığı səbəbindən Çin avtomobillərinin təmiri digər ölkələrdən olan daha geniş yayılmış rəqiblərlə müqayisədə xeyli uzun çəkə bilər. O əlavə edib ki, bir çox mütəxəssis hələ də Çin avtomobilləri ilə işləmək üçün kifayət qədər hazırlıqlı deyil.

Makmanus xəbərdarlıq edib ki, müstəqil avtoservislər çox vaxt Çin avtomobilləri üçün tam texniki məlumatlara və stabil ehtiyat hissələri tədarükünə malik olmurlar. Onun fikrincə, vəziyyət zamanla yaxşılaşacaq, lakin hazırda təmir müddətləri kifayət qədər uzun ola bilər.

Paşa Məmmədli