“Bu sistem kreditlərin elektron müraciət imkanı deməkdir”.

Bunun Valyuta.az-a açıqlamasında Milli Məclisin deputatı Vüqar Bayramov Azərbaycanda tezliklə elektron kredit-təminat sisteminin işə salınmasının əhəmiyyətindən danışarkən deyib. Deputat elektron kredit sisteminin özəlliyindən danışıb:

“Sahibkarlar şəffaf şəkildə və daha qısa zamanda kreditə müraciət edir. Və eyni zamanda onların kredit müraciətləri elektron qəbul olunduğuna görə sıralanır və baxıldıqdan sonra kreditin verilməsi ilə bağlı qərar qəbul edilir. Ona görə sahibkarların, xüsusən də güzəştli kreditlərə çıxış imkanlarının artırılmasına imkan verəcək”.

Deputat bu istiqamətdə aparılan monitorinqlərin nəticələrini də açıqlayıb:

“Sahibkarlar üçün ən ciddi çətinliklərdən biri kredit və ya maliyyə resurslarına çıxış imkanlarının nisbətən məhdud olmasıdır. Bu baxımdan sahibkarların maliyyə təminatının güclənməsinə, onların kreditlərə çıxış imkanlarının artırılmasına, eləcə də kredit resurslarının daha şəffaf şəkildə bölüşdürülməsinə, o cümlədən kreditlərin alınması, rəsmiləşdirilməsi, təqdim olunması prosedurlarının azaldılmasına və daha qısa zamanda kreditlərin verilməsinə imkan yaradacaq”.

Qeyd edək ki, İqtisadiyyat Nazirliyi yanında Sahibkarlığın İnkişafı Fondunun İdarə Heyətinin sədri Osman Xaliyev bildirib ki, Azərbaycanda tezliklə elektron kredit-təminat sistemi işə salınacaq. O, elektron kredit-təminat sisteminin 2024-cü ilin fevral ayından sahibkarlar üçün əlçatan olacağını vurğulayıb.

Aylin