“Bu qanun imkan verir ki, həm maliyyə texnologiyaları inkişaf eləsin, eyni zamanda debitor borclarının maliyyələşdirmə sahəsi inkişaf eləsin, sahibkarlar da maliyyələşdirmənin bu formasına əlçatan olacaq”.
Bunu Valyuta.az-a açıqlamasında iqtisadçı ekspert Xalid Kərimli faktorinq əməliyyatları üzrə ƏDV əvəzləşmə mexanizminin işə salınmasının məqsədindən danışarkən deyib. Ekspert bunun çox yaxşı bir qanun olduğunu izah edib:

“Faktorinq nədir? Biri malı başqasına satır, bu zaman alacaq yaranır. Sonra gözləmir ki, borclu olan pulu ödəsin. Alacaq hüququnu ötürür maliyyə qurumuna və maliyyə qurumundan pulun dərhal alır. Həmin maliyyə qurumu isə gerçək borcludan pulu özü alır. Burada debitor borcunun alqı-satqısı prosesi baş verir.

Debitor borcu iki hissədən ibarət olur:

Əsas və əlavə dəyər vergisi hissəsi.

Vergi Məcəlləsində bu mexanizm yox idi. Banklar müştərilərinə kreditlər verirlər, amma debitor borcunu maliyyələşdirə bilmirdilər”. 

Xalid Kərimli hesab edir ki, Vergilər Məcəlləsində faktorinq  zamanı əvəzləşdirmə mexanizminin problemi 2024 -cü ilin yanvar ayından həll oldunduğuna görə bu sahədə banklar maliyyələşmə apara biləcəklər:

“Eyni zamanda satıcılar da rahat şəkildə debitor borcunun toplanması yox, malların satışına yönələcək. Faktorinq müqavilələrinin şərtləri olur. ƏDV məsələsini həll etməklə hökumət imkan yaradır ki, müştəri hesabına vergi məbləğini köçürəndə faktorinq rahat şəkildə vergini əvəzləyə bilsin”. 

Qeyd edək ki, İqtisadiyyat Nazirliyi yanında Dövlət Vergi Xidmətindən bildirilib ki, bu ildən Azərbaycanda faktorinq əməliyyatları üzrə ƏDV əvəzləşmə mexanizmi işə salınıb. 

Aylin