Avropa İttifaqının xarici işlər və təhlükəsizlik siyasəti üzrə ali nümayəndəsi Cozep Borrel bildirib ki, hazırda "taxıl sazişi"nə qayıtmaq mümkün deyil.

"Görünür, razılığa gəlmək imkanı yoxdur”, deyə Avropa diplomatiyasının rəhbəri BMT Baş Assambleyasının 78-ci sessiyasında iştirak etmək üçün gəldiyi Nyu Yorkda mətbuat konfransı zamanı deyib. 

Buradan görünür ki, "taxıl sazişi"lə bağlı ümidlər tam puça çıxmaq üzrədir. 

Görəsən, Borrelin həmin açıqlaması dünya taxıl bazarına necə təsir edəcək? 

Valyuta.az-a açıqlamasında Liberal İqtisadçılar Mərkəzinin rəhbəri Akif Nəsirli bildirir ki, Borrelin açıqlaması dünyada taxıl qıtlığının yaranacağı anlamına gəlməməlidir:

“Dünya hazırda taxıl məsələsilə bağlı alternativ variantlarla Rusiyanın qadağalarından yan keçməklə problemin həllinə nail olur. Ukraynanın özündə belə 2020-ci ildəki qədər ərzaq buğdası yoxdur. Əvəzində dünyanın əksər ölkələrində ərzaq buğdası istehsalı artıb. Rusiyanın özü əvvəlki illərdə maksimum 37 milyon ton buğda ixrac edirdisə, cari ildə ixracı 48 milyon tona çatdırmağı düşünür. Borrelin açıqlamasının mənası odur ki, problemi həll etdiklərindən "taxıl sazişi" Qərb dünyası üçün artıq maraqlı deyil. Bu açıqlamanın dünya bazarında ərzaq buğdasının aşırı bahalaşmasına səbəb olacağını düşünmürəm. Əksinə, hazırda Rusiyada taxılın qiyməti enir. Azərbaycana ixrac edilən üçüncü sinif buğdanın qiyməti hər tona görə 15 min rubldan 12 min rubla düşüb. Buğdanın qiyməti məsələsində sabitlik hökm sürəcək”.

Ramiz