“Şagirdlər bu dərslərdə biznesin əsaslarını, biznes plan qurmağı öyrənirlər”.

Bu sözləri sahibkarlıq fənninin pilot layihə kimi bir neçə məktəbdə tətbiqi haqqında Valyuta.az-a açıqlamasında təhsil mütəxəssisi Qoşqar Məhərrəmov dedi.

Q.Məhərrəmov bildirdi ki, sahibkarlıq fənninin tədrisinə ehtiyac var: “Yeni dövrdə dünyada startap mühiti, startap ekosistemi çox vacib amilə çevrilib. Kembric kurikulumunda, Beynəlxalq Bakalavriat kurikulumunda illərdir ki, biznes, iqtisadiyyat dərsləri var. Şagirdlər bu dərslərdə bir çox iqtisadi anlayışı - maliyyə, pul, pulun əhəmiyyəti, pulun növlərini və s öyrənirlər”.

Mütəxəssis əlavə etdi ki, bu fənnin məktəblərdə tətbiqi iqtisadi bilikləri və maliyyə savadlılığını artıracaq: “Dövlətin prioritet məsələlərindən biri də maliyyə savadlılığının artırılmasıdır. Məktəblərdə bu istiqamətdə bir çox layihələr həyata keçirilib. Mərkəzi Bank məktəblərdə maliyyə savadlılığı ilə bağlı onlarla təlim keçib. Məktəblərdə sahibkarlıq fənninin tədris olunması bu strategiyanın davamıdır. Azərbaycanda bütün məktəblərdə bu cür fənnlər tədris olunmalıdır. İqtisadiyyat, maliyyə və bənzər ixtisasları bitirənlər, iqtisadçılar, coğrafiya müəllimləri məktəblərdə bu fənni tədris edə bilməlidir”.

Q.Məhərrəmov düşünür ki, bu dərslərdə praktiki işlərə daha çox üstünlük verilməlidir: “Burada şagirdlər yeni dövrün, müasir anlayışın biznes təfəkkürünü öyrənməlidirlər. Startap, layihə, biznes planlar qurmağı bacarmalıdırlar. Düşünürəm ki, bunu edə bilsək, Azərbaycan təhsil sisteminə, gələcəyinə, gənclərinə böyük töhfə vermiş olarıq”.

Qarakişi Vəlizadə