“Manat inzibati metodla tənzimlənmədən bazarın ixtiyarına buraxılsa, düşünürəm ki, müəyyən qədər dəyər itirəcək”.

Bu sözləri Valyuta.az-a iqtisadçı Eldəniz Əmirov “Azərbaycanda manatın məzənnəsi inzibati yolla sabit saxlanılır, hökumət niyə üzən məzənnəyə keçid etmir” sualına cavab verərkən deyib. 

Eldəniz Əmirov deyib ki, nə vaxtsa üzən məzənnəyə keçid olsa, manatın dəyər itirməsi qaçılmaz olacaq:

“Bunun məhsul ixrac edən sahibkarlar üçün müəyyən müsbət tərəfləri olsa da, ölkədə makroiqtisadi tarazlıq üçün mənfi təsirləri daha çox olar. Odur ki, hökumət makroiqtisadi tarazlığın qorunması üçün məhz məzənnə stabilliyinə önəm verməyi əsas götürür”. 

Hazırda dollara olan tələbatın artma səbəblərindən də danışan ekspert qeyd edib ki, bu, mövsümü faktorlarla əlaqədardır:

“Yeni tədris ilinin başlaması idxalın artmasına səbəb olub. Bu da dollara olan tələbatı artırıb. Eyni zamanda xaricdə təhsil alan tələbələrin getməyə hazırlaşması tələbi bir az da yüksəldib".

Eldəniz Əmirov deyib ki, oktyabr ayından başlayaraq dollara olan tələbdə azalmalar mümkündür:

“Buna görə də dollara olan tələbin ötən illə müqayisə bu ilin yekunlarında ciddi şəkildə azalması qaçılmazdır. Belə olan təqdirdə isə manata hansısa bir təzyiqin olacağı gözlənilən deyil. O cümlədən devalvasiyanın olacağını da gözləmirəm”. 

Qeyd edək ki, avqust ayında keçirlən 3 hərracda 162 milyon 530 min dollar satılıb.

Davud