“Çirklənmiş ərzaq mallarının əhaliyə satılması istehlakçıların hüquqlarının pozulmasıdır”.

Bunu Valyuta.az-a açıqlamasında Azad İstehlakçılar Birliyinin sədri Eyyub Hüseynov marketlərdə ərzaq məhsullarının saxlanılması qaydasından danışarkən deyib. 

Sədr bildirib ki, dəfələrlə marketlərdəki soyuducuların temperatur rejiminin yoxlanılması üçün AQTA-də məsələ qaldırıb:

“Hər məhsulun saxlanılma rejimi var. Araşdırma zamanı məhsulların saxlanılma rejiminə uyğun saxlanılıb-saxlanılmadığı üzə çıxacaq. Marketlərə girəndə içəridən pis qoxular gəlir. Market sahibləri işığa qənaət üçün gecələr işıqları söndürürlər. Bir də səhər işə gələndə işıqları yenidən yandırırlar. Elə ərzaq malları var ki, soyuducu sönən kimi xarab olur”.

Eyyub Hüseynov əlavə edib ki, qızdırılmış və sonra soyudulmuş ərzaq malları çirklənmiş hesab olunur:

“Təəssüf ki, Qida Təhlükəsizlik Agentliyi marketlərdəki soyuducuların temperaturunun uyğun olub-olmadığını yoxlamaq üçün monitorinq aparmır. Ölkədə yaşanan problemlərdən biri də budur. Bizə bununla bağlı şikayətlər daxil olur”.

Aylin