“Ərzaq məhsulları ən çox istehlak olunan, ən çox zəruri sayılan məhsul olduğuna görə də idxaldan asılı olmalıdır. Bunu qısa müddətə aradan götürmək, qarşısını almaq qeyri-mümkündür”. 

Bunu Valyuta.az-a iqtisadçı Pərviz Heydərov “ölkənin idxal edilən ərzaq məhsullarından asılılığını necə azaltmaq olar” sualına cavab verərkən deyib.

İqtisadçı bildirib ki, dövlət bununla bağlı işlər görsə də, problemi qısa müddətdə həll etmək mümkün deyil:

“Bəli, yerli istehsalı inkişaf etdirmək lazımdır. Qeyri-neft sektorunu gücləndirmək lazımdır. Ərzaq təhlükəsizliyimizi maksimum təmin etməyə çalışmalıyıq. Bunlar hökumətin diqqət mərkəzində olan mövzulardır və neçə illərdir ki, bu məsələlər prioritet olaraq qalıb. Amma təəssüf ki, burda qısa müddət ərzində nəyəsə nail olmaq mümkün deyil".

İqtisadçı deyib ki, heç bir ölkə maksimum dərəcədə özünü bütün ərzaq məhsulları ilə təmin edə bilməz: 

“Bu real deyil. Dünya ölkələrinə nəzər salsaq, hər şeyini özü təmin edən ölkə tapa bilmərik. Azərbaycan kiçik ölkədir. Biz Cənubi Qafqazda böyük ölkə hesab olunsaq da, elə də böyük potensiala malik deyilik ki, hər şey ilə özümüzü təmin edə bilək. Ona görə də bizim bir çox xarici məhsullardan asılılığımız təbii qəbul edilməlidir”. 

Pərviz Heydərov deyib ki, ölkə daxilində idxal prosesində elə şərait yaratmalıyıq ki, rəqabət olsun:

“Qiymətlər rəqabət şəraitində müəyyənləşsin. İdxalı elə tənzimləməliyik ki, hər növ məhsul üzrə yerli istehsalı da himayə etmək mümkün olsun. Elə olmalıdır ki, ölkəyə gətirilən məhsula daxili bazarda diktə edilən qiymət yerli istehsal ilə məşğul olan şəxsdə bazara öz məhsulunu çıxarmağa mane olmasın. Əgər bazara yerli məhsul çıxmasa, idxal olunan məhsul bazarı tutacaq. 

Yerli istehsalı inkişaf etdirməklə bərabər bazarda rəqabət şəraitinin geniş miqyasda təmin olunmasını, idxalda və daxili bazarda inhisarçılığa yol verməmək və qiymətlərin gömrük, vergi, idxal rüsumları vasitəsi ilə düzgün tənzimlənməsi təmin olunmasına şərait yaratmaq lazımdır. Bunları təmin etmək mümkün olarsa, daxili bazarda xarici mənbələrdən qaynaqlanan inflyasiya, qiymət artımı bugünkü qədər şiddətli xarakter daşımayacaq”.

Davud