Dövlət Statistika Komitəsinin məlumatına görə, cari ilin 6 ayının yekunlarına əsasən, Azərbaycanda iflyasiya 12 faiz civarında olub. Bu isə ikirəqəmli inflyasiya deməkdir. 

Belə olan vəziyyətdə görəsən, 2023-cü ilin sonunda inflyasiya səviyyəsi ikirəqəmli olaraq qalacaq, yoxsa birrəqəmliyə doğru aşağı düşəcək? 

İqtisadi və Sosial İnkişaf Mərkəzinin sədri Rəşad Həsənov Valyuta.az-a açıqlamasında bildirib ki, cari ili birrəqəmli, yoxsa ikirəqəmli inflyasiya ilə başa vurub-vurmayacağımız bir sıra şərtlərdən asılıdır:

“Son iki ayın qiymət dinamikası tempi davam edəcəyi, idxaldan qaynaqlanan ciddi təzyiqlər olmayacağı təqdirdə, rəsmi rəqəmlərə əsasən ilin sonuna inflyasiya həddi birrəqəmli göstəriciyə düşə bilər. Amma oktyabr, noyabr, dekabrda ərzaq məhsullarında müəyyən bahalaşmanın olması da gözləniləndir. Eyni zamanda, enerji qiymətlərinin artması ehtimalından yola çıxmış olsaq, ola bilər birrəqəmli inflyasiya hədəfinə nail olmayaq. 

Amma prosesə alternativ rəqəmlərdən baxanda mənzərə tamam başqadır. Alternativ baxışlar inflyasiyanın rəsmi rəqəmlərdə deyildiyi kimi, 12 faiz deyil, daha yüksək səviyyədə olduğunu söyləməyə əsas verir. Məsələyə alternativ inflyasiya rəqəmlərindən baxsaq, 2023-cü ili birrəqəmli inflyasiya ilə başa çatdırmaq çətin olacaq. Adətən alternativ rəqəmlərlə rəsmi rəqəmlər arasında 80 faizə yaxın fərq olur”. 

Ramiz