ABŞ dollarının qlobal bazarda güclənməsi fonunda Azərbaycana qonşu olan ölkələrin valyutaları da dəyər itirməkdə davam edir. Belə ki, son 1 ayda dollara nisbətən Türkiyə lirəsi 18.7 faiz, Rusiya rublu 5.9 faiz, Gürcüstan larisi 3.1 faiz, Qazaxıstan təngəsi isə 1.2 faiz ucuzlaşıb. 

Yaranmış vəziyyət Azərbaycan manatına nə vəd edir?

Valyuta.az-a açıqlamasında maliyyə-bank eksperti Əkrəm Həsənov bildirib ki, qonşu ölkələrlə müqayisədə yaranmış vəziyyətin manatın məzənnəsinə heç bir təsiri olmayacaq:

“Qonşu ölkələrin hamısında milli valyutalar üzən məzənnə üstündədir və prosesi bazar müəyyən edir. Azərbaycanda isə milli valyutanın məzənnəsini faktiki bazar müəyyən etmir. Manatın məzənnəsi Mərkəzi Bank tərəfindən inzibati yolla müəyyən edilir. MB-də manatı faktiki dollara bağlayıb. Bu vəziyyət 2017-ci ilin fevralın 1-dən davam edir. Yəni 6 ildən çoxdur ki, manatın məzənnəsi sabit olaraq qalır. İndiki halda da manata münasibətdə anoloji vəziyyət davam evəcək. O baxımdan bazarda xeyrimizə olmayan qısa müddətli dəyişiklik olsa da, MB məzənnəni olduğu səviyyədə saxlayacaq”. 

Ekspert bildirir ki, əslində dəyişikliklər Azərbaycan üçün əlverişlidir:

“Azərbaycanın xaricə satdığı əsas məhsulu neftdir. O da dollara satılır. Dollar bahalaşanda isə ölkənin valyuta ehtiyatları da artır. Nə qədər ki, neft və qaz satırıq, dolların bahalaşmasnın ölkəmizə təsiri olmayacaq”.

Ramiz