"TikTok" dünən ABŞ-da fəaliyyətini dayandırıb. Bu gün qüvvəyə minəcək qanun tətbiqin 170 milyon amerikalı tərəfindən istifadəsini dayandırmağı tələb edib. Bununla əlaqədar "TikTok", "Apple" və "Google" tətbiq mağazalarından silinib.  

Valyuta.Az "Reuters"ə istinadən xəbər verir ki,ABŞ-nin yeni seçilmiş prezidenti Donald Tramp dünən bəyan edib ki, bazar ertəsi vəzifəyə keçdikdən sonra "TikTok"a qadağadan 90 günlük möhlət verməyi "böyük ehtimalla" planlaşdırır. Bu, "TikTok"un istifadəçilərə göndərdiyi bildirişdə də vurğulanıb.  

Çinin "ByteDance" şirkətinə məxsus "TikTok", ABŞ vaxtı ilə saat 22:45-də (0345 GMT, Bakı vaxtı ilə 07:45) tətbiqdən istifadə etməyə çalışan istifadəçilərə belə bir mesaj göndərib:  
"ABŞ-da 'TikTok'a qadağa qoyulmasını nəzərdə tutan qanun qüvvəyə minib. Təəssüf ki, bu, 'TikTok'dan istifadə edə bilməyəcəyiniz mənasına gəlir. Bizim şansımız ondadır ki, prezident Tramp vəzifəsinə keçdikdən sonra 'TikTok'un bərpası üçün həll yolu üzərində işləyəcəyini bildirib. Xahiş edirik, xəbərdar olun."  

Dünən gecəyə qədər "ByteDance" şirkətinə məxsus digər tətbiqlər, o cümlədən video redaktə tətbiqi "CapCut" və sosial tətbiq "Lemon8" də ABŞ tətbiq mağazalarında əlçatan olmayıb.  

Trampın bəyanatı və tətbiqə təsiri

"Böyük ehtimalla 90 günlük möhlət veriləcək, çünki bu, düzgün addımdır," Tramp NBC-yə bildirib. "Əgər belə bir qərar qəbul etsəm, yəqin ki, bunu bazar ertəsi elan edəcəyəm."  

Bəzi ABŞ istifadəçilərinin tətbiqdən istifadə edib-etmədiyi dəqiq bilinmir. Lakin bir çox istifadəçilər üçün "TikTok" artıq işləmirdi və tətbiqi veb versiya vasitəsilə açmağa çalışanlar da eyni mesajla qarşılaşıblar.  

Rəhim