Şirkət rəhbəri işçini işdən çıxarmaq üçün 1 ay öncədən xəbərdarlıq etməlidir, amma bəzən rast gəlirik ki, şirkətlər anidən işçini işdən kənarlaşdırırlar. Bəziləri düşünür ki, bu qanunsuzdur. Bəs hansı hallarda rəhbərlər işçini anidən işdən çıxara bilər?

Vəkil Rəşad Əliyev Valyuta.az üçün yazır...

İşəgötürən tərəfindən əmək müqaviləsinin ləğv edilmə əsasları Əmək Məcəlləsinin 70-ci maddəsinə əsasən tənzimlənir. 

Bu maddəyə əsasən,

- Müəssisə ləğv edildikdə;

- İşçilərin sayı və ya ştatları ixtisar edildikdə; 

- Peşəkarlıq səviyyəsinin, ixtisasının (peşəsinin) kifayət dərəcədə olmadığına görə işçinin tutduğu vəzifəyə uyğun gəlmədiyi barədə səlahiyyətli orqan tərəfindən müvafiq qərar qəbul edildikdə; 

- Sınaq müddəti ərzində işçi özünü doğrultmadıqda; 

- Dövlət büdcəsindən maliyyələşən müəssisənin işçisi çalışmanın yaş həddinə çatdıqda işəgötürən tərəfindən əmək müqaviləsi ləğv edilə bilər.

İşçi əmək vəzifələrini kobud şəkildə pozduqda da işdən kənarlaşdırıla bilər. Məsələn, işçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə, yaxud Əmək Məcəllənin 72-ci maddəsində sadalanan hallarda əmək vəzifələrini kobud şəkildə pozduqda işəgötürən tərəfindən əmək müqaviləsi ləğv edilə bilər.

İşçi tərəfindən əmək vəzifələrinin kobud şəkildə pozulması halları aşağıdakılardır:

- özünün xəstəliyi, yaxın qohumunun xəstələnməsi və ya vəfat etməsi istisna olunmaqla heç bir üzürlü səbəb olmadan bütün iş günü işə gəlməməsi;

- alkoqollu içkilər, narkotik vasitələr və psixotrop, toksik və digər zəhərli maddələr qəbul edərək sərxoş vəziyyətdə işə gəlməsi, habelə işə gəldikdən sonra iş yerində həmin içkiləri və ya maddələri qəbul edərək sərxoş vəziyyətdə olması;

- təqsirli hərəkətləri (hərəkətsizliyi) nəticəsində mülkiyyətçiyə maddi ziyan vurması;

-  təqsirli hərəkətləri (hərəkətsizliyi) nəticəsində əməyin mühafizəsi qaydalarını pozaraq iş yoldaşlarının səhhətinə xəsarət yetirməsi və ya onların bu səbəbdən həlak olması;

- qəsdən istehsal, kommersiya və ya dövlət sirrinin yayılması və ya bu sirrin gizli saxlanılması üzrə öhdəliklərini yerinə yetirməməsi;

- əmək fəaliyyəti zamanı yol verdiyi kobud səhvləri, hüquq pozuntuları nəticəsində işəgötürənin, müəssisənin və ya mülkiyyətçinin qanuni mənafeyinə ciddi xələl gətirməsi;

- əmək funksiyasını pozduğuna görə əvvəllər işəgötürən tərəfindən verilmiş intizam tənbehindən nəticə çıxarmayaraq altı ay ərzində təkrarən əmək funksiyasını pozması;

- iş vaxtı ərzində bilavasitə iş yerində inzibati xətalara və ya cinayət tərkibi olan ictimai-təhlükəli əməllərə yol verməsi.