“Fuse Energy” 70 milyon dollar investisiya alıb

Londonda yerləşən “Fuse Energy” startapı 70 milyon dollar məbləğində investisiya cəlb edib. İnvestisiya turuna “Balderton Capital” və “Lowercarbon Capital” birgə liderlik edib.

Valyuta.az xəbər verir ki, enerji texnologiyaları sahəsində fəaliyyət göstərən şirkətin investisiya raunduna həmçinin “Ribbit Capital”, “Lakestar”, “Latitude”, “QuantumLight”, “Future Positive Capital”, “Creandum”, “Accel”, “Rosberg Ventures” və “DSquared” kimi investorlar da qatılıb.

2022-ci ildə Londonda təsis olunan “Fuse Energy”nin bazar dəyəri hazırda 5 milyard dollara yüksəlib. Şirkət bildirib ki, cəlb olunan vəsait beynəlxalq miqyasda genişlənmənin sürətləndirilməsi və yeni məhsulların bazara çıxarılması üçün istifadə ediləcək.

“Fuse Energy” Alan Çanq və Çarlz Orr tərəfindən təsis olunub. Şirkət son mərhələyədək inteqrasiya olunmuş enerji platforması kimi fəaliyyət göstərir. Enerji istehsalı, ticarəti, elektrik təchizatı və quraşdırma proseslərini texnologiya yönümlü vahid struktur altında birləşdirərək vasitəçi xərclərini azaldır və istifadəçilərə daha sərfəli qiymətə enerji təklif edir. Bu model həmçinin enerji şəbəkəsinin balanslı və səmərəli fəaliyyətinə dəstək verməyi hədəfləyir.

Şirkət bununla yanaşı, mikro günəş enerjisi və batareya texnologiyaları üzrə avadanlıqlar da inkişaf etdirir. Eyni zamanda, istifadəçiləri aşağı tələbat saatlarında enerji istehlakına təşviq edən mükafat əsaslı rəqəmsal həllər üzərində çalışır. Bu yanaşma həm istehlakçıların xərclərinə qənaət etməsinə, həm də enerji sisteminin ümumi yükünün azalmasına töhfə verir.

Mayya Hüseynova