"100 manat bir il ərzində təxminən 5 manat 70 qəpik dəyər itirib"

Əhalinin böyük bir qismi hesab edir ki, pul əvvəlki dəyərini itirib. Xüsusilə də insanlar illər əvvəl 50 manatla edilən bazarlıqla bu gün eyni məbləğlə edilən alış-verişi müqayisə edərkən aradakı ciddi fərqi açıq şəkildə hiss edirlər. Keçmişdə gündəlik ehtiyacları rahatlıqla qarşılamaq mümkün olduğu halda, bu gün eyni məbləğlə daha az məhsul almaq mümkündür. Bu vəziyyət cəmiyyətdə “pulun dəyərsizləşməsi” fikrini formalaşdırır. 

İqtisadçı Xalid Kərimli Valyuta.az-a açıqlamasında bildirib ki, bu proses iqtisadiyyatda inflyasiya adlanır:

“İnflyasiya zamanı qiymətlər artır, lakin pulun nominal məbləği dəyişmir. Nəticədə isə pulun alıcı qabiliyyəti azalır. Yəni problem pulun üzərində yazılan rəqəmdə deyil, onun bazarda nə qədər məhsul və xidmət ala bilməsindədir”.

İqtisadçının sözlərinə görə, son illərdə, xüsusilə pandemiya dövründə inflyasiya yüksək olub. Belə ki, iki il ərzində qiymətlər iki rəqəmli səviyyədə artıb. Orta ərzaq qiymətləri isə bir il ərzində təxminən 15% yüksəlib.

“Bu il inflyasiya 5,7% təşkil edir. Bu isə o deməkdir ki, 100 manat bir il ərzində təxminən 5 manat 70 qəpik dəyər itirib. Yəni ötən il 100 manata alınan məhsulları indi 105 manat 70 qəpiyə almaq mümkündür. Eyni zamanda, ərzaq inflyasiyası 8,2% səviyyəsindədir. Bu da onu göstərir ki, bir il əvvəl 100 manatlıq ərzaq məhsulu indi 108 manat 20 qəpiyə başa gəlir. İllər keçdikcə isə inflyasiyanın təsiri ilə pul təbii olaraq daha çox dəyər itirir”.

Tənzilə Ağabalayeva