Fransanın paytaxtı Parisdə 2024-cü ildə keçiriləcək Yaya Olimpiya Oyunlarının baş tutuacağı tarixlər üçün otel qiymətlərində hədsiz artımlar müşahidə edilir.

Valyuta.az Fransa mətbuatına istinadən xəbər verir ki, bəzi bölgələrdə otel qiymətləri 10 dəfəyə qədər artırılıb.

Gələn il 26 iyul-14 avqust tarixlərində Parisdə keçiriləcək Olimpiya Oyunları öncəsi şəhərdəki otellərə sıx rezervasiya müraciətləri edilir. Paytaxtın bəzi yerlərində otel rəhbərləri yüksək tələbatı fürsətə çevirərək, yarışların keçiriləcəyi dövr üçün otaq qiymətlərini 10 dəfəyə qədər qaldırıb.

Paris Olimpiadasını əhatə edən tarixlər üçün otellərin 20 faizi artıq doluluq dərəcəsinə çatıb, rezervasiyaların qiyməti isə geri qaytarılma olmadan öncədən ödənilir.

Paytaxtın bəzi otelləri bu ilin iyul-avqust ayları üçün 200 avro civarında olan otaq qiymətlərini gələn ilin eyni tarixləri üçün təxminən 2000 avro kimi müəyyənləşdiriblər.

Paris ətrafındakı şəhərlərlə yanaşı, ölkənin sahilyanı şəhərlərində də otel qiymətləri xeyli artıb. Marseldəki bəzi otellər gecələmə haqqını 4 dəfə, Liondakı otellər isə 7 dəfə artırıb.

Araşdırmalar göstərir ki, tədbirə ev sahibliyi edəcək bütün şəhərlərdə otel haqları hədsiz dərəcədə artıb.

“Le Parisien” qəzetinin apardığı araşdırmaya görə, sözügedən tarixlər üçün otellərdə olduğu kimi, "Airbnb" kimi platformalarda yerləşdirmə haqları da ikiqat artıb.

Araşdırmaya görə, Parisdə yerləşdirmə xidməti verən 12 müəssisədə bu il 5-6 avqust tarixləri üçün səhər yeməyi daxil gecəlik otaq qiyməti gələn ilin eyni tarixləri üçün orta hesabla 857 faiz artıb.

Qiymətlərin baha olması ilə bağlı aidiyyəti nazirliyə çoxsaylı şikayətlər göndərilsə də, problemin həlli ilə üçün səlahiyyətli qurumların hələ də effektiv çıxış yolu tapmadığı bildirilir.

Paşa Məmmədli